Ҳусанов энди қанча туради? “Сити” ўйинчилари нархлари “остин-устун” бўлиб кетди

Трансферларга ихтисослашган нуфузли манба – transfermarkt.world портали футбол оламидаги энг мураккаб турнир – Англия Премьер-лигаси клублари ва чемпионатда иштирок этиб келаётган футболчиларнинг трансфер нархларини янгилади.

Sports.uz портали янгиланган рейтинг бўйича қизиқарли маълумотларни ўзбекистонлик футбол ишқибозлари эътиборига ҳавола этади. Ҳамюртларимиз мухлислик қилаётган асосий жамоа “Манчестер Сити” ўйинчилари нархларида жиддий ўзгаришлар юз берди.

Демак қизиқарли фактлар билан танишинг:

АПЛда ўсиш катта!

Англия Премьер-лигасида тўп тепаётган футболчилар трансфер нархи умумий ҳисобда 756,25 миллион еврога ўсиб, бугунги кунда 12,78 миллиард еврони ташкил қилмоқда. Бу кўрсаткичлар асосида Премьер-лига жаҳон футболидаги энг қиммат лига бўлиб турибди.

Лигада Холандга етадигани йўқ

Ҳусановнинг норвегиялик дўсти ва жамоадоши Эрлинг Холанд Англия Премьер-лигасидаги энг қимматбаҳо ўйинчи ҳисобланади. Тинимсиз гол ураётган 25 ёшли ҳужумчининг нархи 200 миллион еврога етган.

Унинг энг яқин таъқибчилари – “Арсенал” ҳужумчиси Букайо Сака, “Ливерпуль” ва Премьер-тарихидаги энг қиммат  трансфер соҳиби Александр Исаак портал экспертлари томонидан 140 миллион еврога баҳоланган.

Ҳусановда нима гап?

Янги рейтингга кўра, “Манчестер Сити”нинг ўзбекистонлик легионери Абдуқодир Ҳусановнинг трансфер суммаси ўзгаришсиз қолди. Аввалдан 35 миллион еврога баҳоланиб келган ҳамюртимизнинг нарх кўрсаткичи барқарор турибди.

Шунга қарамай, 21 ёшли ҳимоячимиз нафақат Ўзбекистоннинг, балки бутун Марказий Осиёнинг энг қиммат ўйинчиси бўлиб турибди. Бу минтақа тарихида ҳали ҳеч қайси чарм тўп устаси бу қадар юқори трансфер нархига эга бўлмаган.

Умумий рейтингда Абдуқодир Ҳусанов 45-ўринда қайд этилган.

МДҲда ҳозир Ҳусановга етадигани йўқ

Абдуқодир Ҳусанов Англия Премьер-лигасида ўйнаётган МДҲдан чиққан ўйинчилар орасида энг қимматбаҳо футболчи номини сақлаб турибди. Юқорида келтирилганидек 21 ёшли легионеримизнинг трансфер суммаси 35 миллион еврога тенг.

МДҲ вакиллари орасида иккинчи ўринда қайд этилган “Ливерпуль”нинг грузиялик дарвозабони Гиоргий Мамардашвили нархи икки миллион еврога пасайиб, ўзбек футболчисидан етти миллион еврога арзонроқ баҳоланди.

Украинанинг уч футболчиси – Виталий Миколенко (“Эвертон”) 25 миллион евро, Егор Ярмолюк (“Брентфорд”) 20 миллион евро ва Александр Зинченко (“Ноттингем Форест”) 18 миллион евро туради.

 “Сити” юлдузлари хира тортиб қолди

Англия Премьер-лигасида  нархи кескин пасайган ўйинчилар  “Манчестер Сити” вакиллари бўлиб чиқди. Икки йил муқаддам чемпионатнинг энг зўр футболчиси бўлган Фил Фоден ва ўтган йили “Олтин тўп”ни қўлга киритган Родри 20 миллион еврога арзонлаб кетди. Англиялик ҳужумкор футболчи ҳозир 80 миллион еврога баҳоланаётган бўлса, испаниялик ярим ҳимоячи ундан 10 миллион еврога қиммат туради.

Мбаппе Шомуродовнинг ўйинларини кузатяптими?