Ҳусанов Муҳаммад Салоҳ эрасига якун ясади!

Англия кубоги чорак финалидан ўрин олган “Манчестер Сити” ва “Ливерпуль” ўртасидаги учрашув ҳамон экспертлар томонидан муҳокама қилинмоқда.

Учрашувда Муҳаммад Салоҳ ва Абдуқодир Ҳусановнинг ўзаро кураши, хусусан, ўзбек футболчиси мураккаб вазиятда қолганига қарамай, мисрлик тўпурарга ҳисобни очиш имконини бермаган ҳолат кўпчиликнинг эътиборини тортди.

Англия миллий терма жамоасининг собиқ дарвозабони Жо Харт манчестерликларнинг 4:0 ҳисобидаги ғалабаси билан якунланган баҳсни таҳлил қилар экан, Муҳаммад Салоҳнинг ўйини ҳақида кескин фикрлар билдирди.

TNT Sports телеканалига берган интервьюсида Жо Харт мисрлик футболчининг ишончи пасайганини, айниқса ўйин бошида натижани ўзгартириши мумкин бўлган муҳим вазиятларда бу яққол сезилганини таъкидлади.

Харт Салоҳнинг голли имкониятларни қўлдан чиқарганидан кейинги ишончига шубҳа билдирди. Шу билан бирга, собиқ дарвозабон 11-рақамли футболчи ўйинини кузатиш ғалати бўлганини тан олди, чунки у кўп йиллар давомида жуда юқори даражани кўрсатиб келган.

Жо Харт шундай деди: “Ростини айтсам, бу гал Салоҳнинг ўйинини томоша қилиш  қийин эди. Биз унинг шунчалик ишончли ўйинчи эканига ўрганиб қолга эканмиз”.

Муҳаммад Салоҳнинг ўйинидаги фарқ, айниқса унинг “Сити” ҳимоя чизиғидаги хатодан кейин ажойиб имкониятдан фойдалана олмаганида яққол кўринди.

- Менимча, ўша биринчи ҳолат — Абдуқодир Ҳусанов йиқилиб, кейин ўрнидан туриб, зарба беришга шайланган Муҳаммад Салоҳдан тўпни олиб қўйган пайт — мисрлик тўпурар бугунги кунда қандай ўйнаётганининг ҳақиқий кўрсаткичи бўлди, - деди Жо Харт.

Бу қаттиқ, аммо адолатли фикр, чунки ўша пайтдан кейин мисрлик ҳужумчи ўзига бўлган ишончни йўқотгани сезилиб қолди. Аксарият мутахассимлар ўша Ҳусанов тўпни қайтариб юборган вазиятда Салоҳ гол ура олганида учрашув натижаси умуман бошқача бўлиши мумкинлигини таъкидлашмоқда.

Жо Харт ҳам ўзининг таҳлилларидан кели чиқиб, 33 ёшли футболчининг руҳий ҳолати умумий натижага катта таъсир қилганини айтди.

- Бу баҳсда Муҳаммад Салоҳга қийин бўлди ва у жуда тушкун кўринди. Биз уни танаффусда майдонга қайтиб чиққанини кўрдик. У синиб қолганди, бутунлай синиб қолганди, - деди собиқ дарвозабон.

Айниқса, Салоҳ мавсум охирида клубни тарк этишини айтганини ҳисобга олсак, танаффусдаги бундай эмоционал ҳолат кўп нарсадан далолат беради.

Шунга қарамай, Харт охирги ойларда натижа учун масъулият ҳали ҳам ҳужумчи зиммасида эканини аниқ айтди.

- Салоҳ тажрибали ўйинчи. У “Ливерпуль” учун жуда муҳим… ҳозир у майдонда 100 фоиз ишлаши ва жамоаси учун голлар уриши керак, - деди Жо Харт.

Бир ярим асрлик рекордда қатнашган Ҳусановни ашаддий рақиб афсонаси ҳам мақтади

Сен кетавер, буёғига Ҳусанов бор!

Еврокубокда ўйнайдиган клуб ўзбек футболчиси трансферини эълон қилди