Имкониятлар қанадй? FIDE Circuitда Праггнанандҳаага етиб олса бўладими?

Праггнанандҳаа ҳозир FIDE Circuit'да 86,28 очко билан пешқадам. У тўртта ёпиқ турнирда тўплаган натижалари билан олдинга чиқди, лекин ҳали 50 дан ортиқ иштирокчи иштирок этадиган каттароқ очиқ турнирда ўйнамаган. Олдинда иккита ана шундай мусобақа – Жаҳон Кубоги ва Grand Swiss. Агар Праг улардан бирида кучли олтиталикдан ташқарида қолса ёки кам очко тўпласа, пешқадамлиги дарҳол хавф остида қолади.

Нодирбек Абдусатторов 50,78 очко билан иккинчи ўринда. Унинг энг катта баллари Tata Steel Masters ва UzChess Cup даги учинчи ўринлардан келган. Йил охирида у ҳам Жаҳон Кубоги, ҳам Grand Swiss да қатнашади. Ҳар бирида 15–18 очколик натижа Нодирбекни 90 очкога яқинлаштиради ва Прагни қувиб ўтиш имконини беради.

Яна бир вариант, агар Праг Жаҳон Кубоги ёки Grand Swiss да ғолиб чиқиб, Номзодлар турнирига бевосита йўлланма олса, Circuit йўлланмаси навбатдаги энг юқори ўриндаги ўйинчига ўтади. Ҳозир бу ўрин Нодирбекда.

Қисқаси, Праг ҳозирча олдинда, лекин ҳали ҳеч нарса ҳал бўлмаган. Нодирбек учун эса бор-йўғи битта-иккита кучли натижа кифоя, шунда у FIDE Circuit ғолибига айланиб, 2026 йилги Номзодлар турнирига йўлланма олган илк ўзбек шахматчига айланиши мумкин.