Instagram даромад манбаи. Месси ва Неймар бирлашиб, Роналдуга ета олмади

Ижтимоий тармоқ ҳозир мулоқот қилиш билан бир қаторда, машҳур инсонлар учун яхшигина даромад манбага айланган. Қўйида сизларнинг эътиборингизга Instagram саҳифасидан миллионлаб доллар ишлаб топаётган спортчилар билан таништирамиз.

5. Неймар (139 млн обуначи)

Бразилиялик эркатой дунёнинг энг кўп маош олувчи футболчиларидан бири ҳисобланади. Париж клубида ўтказган ҳар бир мавсуми учун Неймар бонуслар билан 40 миллион долларни ўз ҳисобига ўтказиб олади. Унинг Instagram рекламаларидан топган даромади эса 8,1 миллионни ташкил қилади. Футболчи ушбу тармоқда 139 миллиондан зиёд обуначини қамраб олган.

4. Дэвид Бекхэм (63,1 миллион обуначи)

Англиялик собиқ футболчининг Instagramдаги битта постига янги Ламборжини олса бўлади. Асосий реклама даромади H&M ва Adidas брендлари ортидан келадиган Бекхэмнинг ушбу ижтимоий тармоқдаги йиллик даромади 11,6 миллион долларни ташкил қилади. Умумий ҳисоблаганда, Дэвиднинг йиллик бюджети 70 миллион атрофида бўлади.

3. Вират Кохли (63 миллион обуначи)

"Chikoo" номи билан машҳур ҳиндистонлик спортчи Вират Кохли крикетчилар орасида энг қимматбаҳоларидан бири ҳисобланади. Forbes маълумотига кўра, Кохли йилига 24 миллион евро ишлаб топади ва унинг асосий қисмини Instagramдан келадиган маблағ ташкил қилади. BizzBingo нашри унинг реклама бюджетини 15,6 миллион долларга баҳолади.

2. Лионель Месси (154 миллион обуначи)

Ижтимоий тармоқ орқали даромад қилиш бўйича иккинчи ўринни "Барселона" сардори Лионель Месси эгаллади. Аргентиналик форвард жаҳоннинг энг кўп даромад қилувчи футболчиси ҳисобланади. Ортда қолган бир йил мобайнида Лео Instagram ортидан 30,4 миллион евро топди.

154 миллион ўқувчига эга "Барселона" супертўпурари ўз саҳифасида асосан Pepsi, Adidas ва Konami брендлари рекламасини жойлайди.

1. Криштиану Роналду (223 миллион обуначи)

Криштиану Роналду ўтган йилда Instagram саҳифаси ортидан энг кўп даромад қилган спортчи бўлди.

Сўнгги бир йил мобайнида супер ҳужумчи жами 43 та реклама пости жойлаган ва умумий миқдорда 50,3 миллион евро ишлаб олган. Унинг битта пости 1,7 миллионни ташкил қилади.

Шундай қилиб, унинг Instagramдан топган даромади "Ювентус"дан оладиган маошидан анчагина юқори. Унинг Турин клубидаги йиллик маоши 30 миллион доллардан ошади.