Исломбек Исоқжонов: “Навбаҳор” доим Олий лигада ўйнаб келган ва бундан кейин ҳам ўйнайди

Хабарингиз бор, бундан бироз аввал Тошкентдаги ТТМИ ўйингоҳида 2017 йилги Олий Лига мусобақасида иштирок этиш учун Наманган вилоятининг икки жамоаси ўзаро майдонга тушди.

Якунланган мавсум Олий Лигада 15-ўринни эгаллаган “Навбаҳор” 1-лигани 2-поғонада тугатган “Норин” жамоаси билан куч синашди. Қизиқарли ва кескин курашларга бой ўтган баҳсда рақибидан кўра маҳоратлироқ ҳисобланган “лочинлар” 3:1 ҳисобда зафар қучишди ва янги мавсумни яна кучлилар сафида бошлайдиган бўлди.

Ўйиндан сўнг учрашувдаги дастлабки гол муаллифи бўлган “Навбаҳор” футболчиси Исломбек Исоқжонов SPORTS.uz мухбирига ўйин ҳақидаги фикрларини билдириб ўтди.

- Авваламбор “Навбаҳор”нинг барча мухлисларини бугунги муҳим ғалаба билан табриклайман. Бугун ҳар иккала жамоага ҳам қийин бўлиши аввалдан маълум эди. Учрашувни деярли бир киши кам бўлиб ўтказганимизга қарамай ғалаба қозонганимиздан ҳурсандман.

Бугунги ғалабада мураббийларимизнинг меҳнатлари беқиёс. Қолаверса, жамоадошларимга ҳам ўз миннатдорчилигимни билдираман. Улар бугун майдонда бир оиладек ҳаракат қилишди.

Шуни алоҳида таъкидлашни истардимки, “Навбаҳор” доим Олий лигада ўйнаб келган ва бундан кейин ҳам ўйнайди, - дейди маҳоратли футболчи.