Испания кубоги: ВАРдаги узоқ текширувга расмий изоҳ берилди

Испания ҳакамлар техник қўмитаси "Барселона" ҳимоячиси Пау Кубарсининг "Атлетико" дарвозасига киритган голи нега олти дақиқадан ортиқ вақт давомида ВАР орқали текширилганига изоҳ берди.

Испания Кубоги ярим финалининг иккинчи бўлими аввалида киритилган гол бош ҳакам Хуан Мартинес Мунуэра томонидан офсайд сабаб бекор қилинган эди.

Расмий баёнотда айтилишича, вазиятни баҳолаш жараёнида ВАР жамоаси ярим автоматик офсайдни аниқлаш тизими (SAOT) орқали таҳлил ўтказган.

Таҳлил давомида кадрда футболчилар жуда зич жойлашгани сабабли моделлаштиришда носозлик юзага келган. Тизимни қайта калибровка қилишга уринишган, бироқ бунинг имкони бўлмаган. Шундан сўнг белгиланган тартибга мувофиқ равишда ВАР жамоаси офсайд чизиқларини қўлбола тарзда чизиб, якуний ва тўғри қарор қабул қилган.

Айнан шу сабабли текширув жараёни одатдагидан кўпроқ вақт олган. Шунингдек, "SAOT" ишламагани учун эпизод реконструкцияси трансляция вақтида намойиш этилмагани маълум қилинди.