"Жаҳон чемпионати U-20". Янги Зеландия бугун ҳимояда ўйнайди, дейдиганлар адашади ёхуд рақибнинг 1-турдаги ўйинидан таҳлил!

Бугун 20 ёшгача бўлган футболчилар ўртасидаги жаҳон чемпионатининг 2-тури доирасида Равшан Ҳайдаров бошчилигидаги Ўзбекистон терма жамоаси ўз ўйинини ўтказади. Унда вакилларимизга Янги Зеландия жамоаси рақиблик қилади. 

Учрашув Тошкент вақти билан 23:00 да старт олади. Беллашувни "УзРепорт ТВ" телеканали орқали жонли эфирда намойиш этади. 

Хўш, рақибларимиз қандай кучга эга? 1-турда нима ёки нималар эвазига ғалаба қозонди? Қуйида жамоанинг ўйинини таҳлил қилишга уриниб кўрамиз!

Юқоридаги расм Гватемала - Янги Зеландия ўйини статистикаси ҳисобланади. Кўриб турганингиздек, шимолий америкаликлар ўйин давомида рақибдан кўпроқ зарба йўллаган. Аниқ зарбалар ҳам уларда кўпроқ. Баҳсда янги зеландияликлар тўп назоратига кўпроқ урғу беришган. 

Умуман олиб қараганда, Янги Зеландияни Австралияга ўхшатса бўлади. Жисмонан бақувват футболчилар, тўпни ўзида ушлашни яхши кўрадиган ижрочилар ва "киллер" ҳужумчилар. Бироқ бу типдаги жамоаларнинг нозик жойи ҳам кўп бўлади. Улардан бири - тезлик. Гватемала футболчилари рақибни кўпроқ қарши ҳужумларда қийнаб қўйди. Гавдали ва бўйи баланд бўлган океанияликлар ҳимояга қайтишда муаммоларга дуч келди. 

Юқоридаги гапимизнинг исботи ўлароқ, шу расмни жойлаймиз. Оқ либосдаги футболчи Гватемала аъзоси ҳисобланади. Унинг рақиб майдонига бемалол кириб олиши мумкинлигига эътибор бердингиз-а?! Янги Зеландия ҳимоя чизиғида атиги 3 нафар ўйинчи қолган. Бироқ гватемалаликлар ижродаги маҳорат етишмаслигиданми ёки шунчаки омадсизликми, хуллас бу вазиятдан унумли фойдалана олишмади. 

Океанияликларнинг устунлиги тартибли футбол ҳисобланади. Янги Зеландия катта эҳтимол майдонда тўпни ўзида олиб юриши кутилмоқда. Агар вакилларимиз уларни ҳимояда чайқатиб, комфорт зонасидан чиқаришни эплай олишса, бизга нисбатан осонроқ бўлади. Масалан, Файзуллаевнинг тезлиги, Раҳмоналиевнинг кесиб бериладиган ақлли паслари ва Пўлатхўжанинг рақибни тактик томонлама чалғита олишини ҳисобга олсак, бизда ғалаба учун имконият юқори эканини кўришимиз мумкин. Қолаверса, учрашув давомида тўп назоратининг ҳам бизда бўлиши фойдадан ҳоли бўлмайди. Боиси, бўйи баланд футболчилар тўпсиз нисбатан тез чарчаб қолади. 

Янги Зеландиянинг ягона гол урилган вазияти. Марказдан битта узун пас, ҳимоячининг қўпол хатоси ва ҳужумчининг имкониятдан унумли фойдалангани акс этган суратлар. Ҳолатни ифода этишда шуларнинг ўзи етарли, деб ҳисобладик. Бизда бугун бундай хатолар кузатилмайди, деган умиддамиз. Акс ҳолда, рақиб шу каби хатоларни кечирмаслигини 1-турда кўрсатиб қўйди. 

Рақибларимизнинг кичик мундиалга қадар бўлган тайёргарлиги ҳақида гапирадиган бўлсак, Янги Зеландия термаси 4 та ўйиндан бери мағлуб бўлмаяпти. Қизиғи, улар сўнгги бор 17 февралда айнан Гватемалага енгилганди. Шундан сўнг Даррин Безилей шогирдлари Индонезия (2:1), Фижи (3:0), Эквадор (1:0) ва ЖЧ илк турида Гватемала (1:0) термаларидан устун келди.

Бўлажак баҳсда ёшларимизга муваффақият ёр бўлишини тилаб қоламиз! Биз вакилларимизга тўлиқ ишонамиз. Олға, йигитлар. Олға, Ўзбекистон!!!

Шоҳрух Зоиров мақоласи.