Жамшид Саидов: "Бизни ўз фишкамиз бор"

Суперлиганинг 18-турида "Қизилқум" жамоаси "Сўғдиёна"ни қабул қилди ва 1:1 ҳисобида дуранг ўйнади. Беллашувдан сўнг жамоа бош мураббийи Жамшид Саидов матбуот анжуманида иштирок этди.

- Кўп гапиришга хожат йўқ. Якунда эътиборсизлик қилганимиз учун гол ўтказиб юбордик. Рақибни қандай ўйнашини билар эдик. Қарши ҳужумларда имконият бўлди, аммо вазиятлардан фойдалана олмадик. 

- "Қизилқум" кучли жамоаларга қарши яхши ўйин кўрсатаётганини сабаби нимада?

- Бу футболчиларнинг психологияси билан боғлиқ. Улар кучли жамоага қарши руҳан тайёргарлик кўриб майдонга чиқади, кучсиз жамоа билан эса йўқ. Бизни ўз фишкамиз бор. Баъзан омад келмай қолмоқда. Ҳаммаси футболчиларга боғлиқ.

- Акаки Шулая билан кичик жанжал кузатилди?!

- Бу эмоция. Уни ички муҳитга ҳеч қандай таъсири йўқ.

- Файзулла Қамбаровнинг захирага олиниши сабаби нима?

- Биринчи навбатда у буни ўзи сўради. Оёғида оғриқ ҳис қилгани учун. Ўзи мураббийлар жуда камдан-кам ҳолларда марказий ҳимоячини алмаштиради.

- Уй стадионида эмаслигингиз машғулот ўтказишда муаммолар келтириб чиқармаяптими?

- Биз барча ўйинларимизни меҳмонда ўтказяпмиз. Ўйин ва машғулот аренаси бошқа-бошқа. Бизни қўллаб турган ишқибозлар ҳам йўқ. Уйда деворлар ҳам ёрдам беради, деб бекорга айтмайди. Раҳбарият кўз олдида тўп суриш барибир бошқача. Футболда майда деталлар бўлмайди. Барчаси муаммо туғдиради.