Жанубий Корея собиқ терма жамоа мураббийи мухлислар таъқиби сабаб АҚШга учиб кетди

Бош мураббийлик лавозимини яқинда тарк этган Жанубий Корея терма жамоасининг собиқ устози Хон Мен Бо жаҳон чемпионатидан қайтганига икки кун ўтар-ўтмас АҚШга учиб кетди. Бу қарорга унинг манзилига йўналтирилган мухлислар босими ва таъқиблари сабаб бўлгани айтилмоқда. Инчхон аэропортида терма жамоа қайтиши олдидан вазият кескинлашган эди. Мухлислар Хон Мен Бо ва футболчиларни баланд овоздаги норозилик чақириқлари билан кутиб олди. Тартибсизликлар хавфи туфайли ҳукумат аэропортда хавфсизлик чораларини кучайтирди, 100 дан ортиқ полиция ходими жалб этилди. Бу қадам интернетда мураббийга нисбатан ўлдириш билан таҳдид қилувчи хабарлар пайдо бўлганидан сўнг кўрилгани маълум қилинди. Телеканал MBC хабарига кўра, Хон Мен Бо Инчхон аэропортида АҚШга йўл олаётган пайтда кўрилган. У бошига кепка кийиб, юзини ниқоб билан беркитган ҳолда юрган. Журналистлар саволларига жавоб берар экан, у “айтадиган гапларим бор”, деб қисқача изоҳ берди, аммо ҳозирча батафсил шарҳ беришдан бош тортди ва кейинроқ фикр билдиришини айтди. Манбаларга кўра, мураббий Лос-Анжелесга учиб кетган. 30 июнь куни жаҳон чемпионатидан қайтган терма жамоани Инчхон аэропорти чиқиш қисмида тахминан 200 нафар киши кутиб олган, гоҳида соат тунги 3–4 лар бўлишига қарамай. KBS телеканали тарқатган маълумотларга кўра, Хон Мен Бо келишигачаёқ аэропортнинг келувчилар қисмида баланд овозли норозилик чақириқлари эшитила бошлаган. Интернетда тарқалган видеолавҳаларда мухлислар барабан чалиб, “Хон Мен Бо, кет!” деб бақираётгани аниқ эшитилади. Мураббий ва футболчилар залга кирган пайтда бақир-чақир ва ҳуштаклар янада кучайган. Жанубий Корея президенти Ли Чжэ Мен жаҳон чемпионатидаги омадсиз иштирокни очиқ танқид қилди ва спорт, маданият ва туризм вазирлигини натижалар сабабларини ўрганишга чақирди. Кейинчалик вазирлик Корея футбол ассоциацияси (KFA) фаолияти юзасидан текширув бошланганини маълум қилди. 57 ёшли Хон Мен Бо 28 июнь куни Жанубий Корея терма жамоаси бош мураббийи лавозимидан истеъфо берганини эълон қилган. У терма жамоани 2013–2014 йилларда, шунингдек 2024 йилдан буён бошқариб келаётган эди. Унинг шартномаси 2027 йилгача амал қилиши керак эди. АҚШ, Канада ва Мексикада ўтган жаҳон чемпионатида Жанубий Корея терма жамоаси гуруҳ босқичидан чиқишга муваффақ бўлмади.