Жасур Абдураимов: Агар легионернинг маҳаллий ўйинчилар билан савияси тенг бўлса, мен биринчи навбатда ўзбекистонлик футболчиларга имконият бераман

"Металлург" - "Андижон" (2:0) учрашувидан кейин мезбонлар бош мураббийи Жасур Абдураимов ўз фикрларини билдирди. Бу ҳақда бекободликлар матбуот хизмати хабар берди.

- Тан олиш керак, биринчи таймда ўйин бўйича "Андижон" устунлик қилди. Майдон марказини рақибга топшириб қўйдик. Андижонликларда ҳисобни очиш учун имкониятлар кўп бўлди. Шундай вазиятларда жамоани голдан сақлаб қолган Лобановдан миннатдорман. Иккинчи таймда эса ўзимизга келдик ва керакли натижани қўлга киритдик. Кузатаётган бўлсангиз, биз тобора ҳужумкор футбол намойиш этмоқдамиз. Аммо қисқа фурсат ичида ўйин услубини бутунлай ўзгартириш, мослашиб кетиш қийин кечади. Шу йўлда ишлашда давом этамиз.

- Макеев ва Нарзуллаев каби футболчилар нега майдонга тушишмади?

- Макеев таркибдан ўрин эгаллаши учун ўзини кўрсатиши керак. Мен Муборакдаги матбуот анжуманида ҳам айтгандим, легионер маҳаллий футболчидан бир бош устун бўлиши лозим, деб. Агар савияси тенг бўлса, мен биринчи навбатда, ўзбекистонлик футболчиларга имконият бераман. Нарзуллаев ҳам тайёргарлик борасида жамоадошларига ютқазяпти. Айни пайтда унинг позициясида Ғофурбеков ишончли ҳаракат қилмоқда, кўпроқ креатив ўйин кўрсатяпти. Шу боис ҳам бугун у майдонга тушди.

- U-21 жамоаси ўтган мавсум чемпиони бўлганди. Ўша таркибдан қайси футболчиларни асосий таркибга жалб этгансиз?

- Айни пайтда ўша жамоанинг 4-5 нафар ўйинчиси асосий таркиб машғулотларида қатнашаяпти. Бироқ улар ҳозирча Суперлига баҳсларини тортишга тайёр эмас. Менга футболчининг жисмоний тайёргарлигидан ташқари фикрлай олиши биринчи навбатда керак. Ақл билан ўйнайдиган футболчига биринчи навбатда имконият берилади. У хоҳ ёш футболчи бўлсин, хоҳ 37 ёшли футболчи. Замонавий футболда биринчи ўринда футболчи "каллали" бўлиши даркор.

- Одилбек Абдумажидовнинг ўйини ҳақида нима дея оласиз?

- У ҳозир 20 ёшда. Ақлли футболчи, тўғри бугун қизил карточка олди. Аммо ўз ёши учун яхши ҳаракат қилди, дея оламан. Ўйлашимча, 2-3 йилдан кейин терма жамоада ўйнаб кетади. Фақат ҳаракат қилишдан тўхтамаслиги, меҳнатдан қочмаслиги лозим.