Жавоҳир Илёсов: "Локомотив"даги дебют мавсумимни ижобий баҳоласам бўлади

Чемпионатимиздаги истеъдодли дарвозабонлар ҳақида гап кетганда, бу борада шубҳасиз «Локомотив» посбони Жавоҳир Илёсовни тилга олиб ўтсак арзийди. У жорий мавсумда «Локомотив» сафига қўшилганидан кейин ўз меҳнати эвазига жамоанинг биринчи рақамли дарвозабонига айланди. Гарчи «Локо»да дебют мавсумини ўтказаётган бўлса-да, у ўзидан ёмон таассурот қолдирмаяпти. Бунинг устига уни Ўзбекистон миллий терма жамоасининг йиғинларига ҳам чақириб туришди. Хуллас, Илёсовни ушбу чемпионатда янада ўсишга эришди деб айтсак бўлади. «Машъал» академиясидан етишиб чиққан Илёсов кейинчалик «Металлург» дарвозасини ҳимоя қилди, бу йилдан эса «Локомотив» шарафини ҳимоя қилиб келмоқда.

- Менинг шу даражага етишишимда мураббийларнинг энг катта ҳиссаси бор деб ҳисоблайман, - дея гап бошлади, Илёсов. - Бунинг устига инсон ҳар доим ўзининг устида тинмай ишлайверса, албатта кўзлаган мақсадига эриша олади. Бу йўлда асло тўхтаб қолмаслик лозим. Керак бўлса, ўз устида икки баробар кўпроқ ишлаш талаб этилади. Шу нуқтаи назардан олиб қараганда, мен ҳам ишлашда давом этяпман. Менимча, бундан ортиқ бошқа сабаб бўлмаса ҳам керак. Боя айтганимдек, барчаси фақат инсоннинг ўзига боғлиқ.

Хўш, Жавоҳир учун «Локомотив»даги дебют мавсуми қандай ўтмоқда? У бу ерга келиб ўзи истаган ва кўзлаган мақсадларига қанчалик эриша оляпти? Бу ҳақида унинг ўзи қуйидагича муносабат билдирди.

- Мен учун яхши дейишим мумкин. Чунки ҳали фаолиятим давомида иккинчи ўринни олмагандим. Шу сабабли иккинчи ўринни оладиган бўлсам, бу мен учун биринчиси бўлади. Шундай экан, мен учун буни ижобий деб баҳоласак бўлади. Қолаверса, илк бор Осиё Чемпионлар лигаси мусобақасида иштирок этишга ҳам муваффақ бўлдим. Гарчи гуруҳдан чиқа олмаган бўлсак-да, бундай нуфузли турнирда илк бор иштирок этганим учун менда илиқ таассурот қолдирди. Албатта, мухлислар қандай иштирок этганимизга баҳо беришади. Бироқ ОЧЛда ёмон иштирок этмадик деб ҳисоблайман.

Шунингдек, бунгача Жавоҳир Илёсовни ҳам миллий терма жамоага чақириб туришганди. Кейин эса мураббийлар ўзгарди ва табиийки, таркибда ҳам шунга яраша ислоҳотлар сезилмоқда. Натижада ҳозирча Илёсов ҳам термага чақирилаётгани йўқ.

- Ҳамма мураббийнинг футболга ўз қарашлари бўлади. Бош мураббий ўзига ёққан дарвозабонларни терма жамоага чақиряпти. Балки ҳозирги пайтда клубимда асосий таркибда ўйнамаётганим учун ҳам чақирмаётгандир. Лекин яна терма жамоада ўйнашга ҳаракат қиламан. Ўйлайманки, қачон миллий терма жамоа учун муносиб бўлсак, шунда чақиришади. Энг катта мотивация – бу миллий терма жамоадир. Ҳамма футболчининг орзуси бош жамоа сафида тўп суришдир. Шунинг учун ҳам бу ҳар биримизга қўшимча куч ва далда бериб туради. Масалан, терма жамоада бир марта бўлса ҳам ўйнашни истаган футболчилар қанча? Айтмоқчиманки, аслида миллий терманинг 23 талик рўйхатига кириш ҳам жуда қийин. Юрт, ватан шаъни учун ўйнаш ҳар бир футболчи учун чинакам бахт, - дейди Илёсов.

Чиндан ҳам Жавоҳир охирги пайтларда клубида захирада ўтирибди. Бунга эса тажрибали Игнатий Нестеровнинг яна майдонга қайтганлиги сабаб. Шунга қарамасдан, Илёсов асосий таркиб учун курашишини айтиб ўтди.

- Юқорида айтиб ўтганимдек, ҳар бир мутахассиснинг дунёқараши бор. Мураббийлар эса Игнатий Нестеровга ишонч билдиришяпти. Лекин ўз устимда ишлашдан тўхтамайман. Ҳаёт эса давом этади. Шунчаки, қўлни тушириш ниятим йўқ. Мен ҳар доим охиригача ҳаракат қиламан. Муҳими, меҳнат қилишдан тўхтамайман. Ишонаманки, бу босқичдан ҳам яхши ҳолатда ўтиб оламан ва бундан кейин ҳам самарали ўйин кўрсата оламан деб умид қиламан.

Дарвозабонлар одатда ўз ҳамкасбларининг ўйинларини кузатиб боришади, шу жумладан Жавоҳир ҳам. Шуни инобатга олганда, ундан айни пайтда Ўзбекистондаги биринчи рақамли дарвозабон ким эканлиги ҳақида сўрадик.

- Ўзбекистондаги биринчи рақамли дарвозабонми? Менимча, айни пайтда бундай посбонлар иккита деб ўйлайман. Биттасини айта олмайман, чунки мен учун иккаласи ҳам ёқади. Булар – Санжар Қувватов билан Элдор Суюнов. Иккала дарвозабон ҳам бир хил даражада ўйин кўрсатишяпти. Албатта, Игнатий Нестеров ҳам яхши дарвозабон. Биз ёшлигимизда шунга ўхшаш дарвозабон бўлишни орзу қилардик. Ҳозир ҳам ундан ўзимиз учун кўп нарсаларни ўрганяпмиз ва ўзи ҳам бизга тажрибаларини ўргатиб боряпти, - дейди посбон.

Бу йил «Локомотив» таркибида дебют мавсумини ўтказган дарвозабон келаси йили ҳам темирйўлчилар билан бирга қоладими? Ёки режалари ўзгарармикин? Қолаверса, ўзи учун қадрдон бўлган «Машъал»нинг Суперлигага қайтгани сабабли Жавоҳирнинг яна Муборакка қайтиши борасида эҳтимоллар пайдо бўлиши мумкинми? Буларга унинг ўзи шундай жавоб қайтарди:

- Ҳозирча аниқ гап айта олмайман. Аввало йил тугасин-чи! Кейин шунга қараб воқеалар ривожини кузатамиз. Шунинг учун ҳозирдан бир нарса дея олмайман. Қолаверса, клуб билан яна амалдаги шартномам бор. «Машъал»га қайтаманми? Билмасам, ҳозир айтганимдек, «Локомотив» билан шартномам бор. Балки клублар ўзаро келишишса, ҳамма нарса бўлиши мумкин. «Локо»га тегишли бўлганим учун клубим нима деса шу бўлади. Мен эса ҳеч нима дея олмайман. Четдан эса таклифлар бўлгани йўқ. Ҳали ўзимиздан ҳам таклиф бўлмаган.

Шунингдек, иқтидорли посбон жорий мавсумдаги чемпионатимиз ҳақида ҳам ўз фикрлари билан ўртоқлашди. Айниқса, «Пахтакор»нинг муддатидан анча аввал чемпионликни қўлга киритгани ва бу борада «Локомотив»нинг жиддий қаршилик кўрсата олмагани ҳақидаги гап-сўзларга Илёсов шундай деди:

- «Пахтакор»нинг чемпионлигига келсак, улар кучли футболчиларни йиғиб олди. Шунинг учун таркиби маҳоратли ўйинчилардан ташкил топди. Албатта, бизнинг таркибимиз ҳам чакки эмасди. Лекин «Локомотив»дан деярли ярим таркибдан кўпроқ футболчилар кетди. Балки ўйинимизда қандайдир сусайиш бўлгандир. Бир қатор футболчилар «Локомотив»дан «Пахтакор»га ўтишди. Бу ҳам албатта жамоа ўйинига таъсир кўрсатди деб ўйлайман.