Жефф Монсон: Роналду энди аввалгидек эмас, Месси энг зўри!

ММА бўйича собиқ жангчи Жефф Монсон Қатардаги жаҳон чемпионатида муваффақиятсиз иштирок этган Португалия терма жамоаси футболчиси Криштиану Роналду ҳақида ўз фикри билан ўртоқлашди.

Роналду гуруҳ босқичида битта гол урди ва турнир давомида “Бенфика” ҳужумчиси Гонсало Рамосга ўрнини бой бериб, асосий таркибдаги жойини йўқотди ва аксарият ўйинларда захирада қолиб кетди.

“Менга Криштиану Роналду спортчи ва шахс сифатида ёқади. У ўз мухлисларига, айниқса болаларга жуда меҳрибон.

Роналду жуда узоқ вақт ажойиб ўйин кўрсатди ва кўпчилик спортчилар учун намуна бўлиб келди. У тарихдаги энг яхши футболчилардан бири.

Ҳар қандай спортчи унинг матонати ва меҳнатига ҳавас қилиши мумкин. Лекин, менинг фикримча, Роналдуга ёши таъсир қилган - у энди аввалгидек эмас. Мен учун айни дамда биринчи рақамли футболчи Лионель Месси”, - дейди Монсон.