Кеча “Қўқон-1912” жамоаси ўз майдонида АГМКни 1:0 ҳисобида мағлубиятга учратди. Лекин ушбу ғалаба қўқонликларга татимади, десак ҳам ҳақиқатни айтган бўламиз.

Ўйинни кўпчилик кўрди, афсуски, мезбонларнинг икки футболчиси – Шоҳназар Норбеков билан Суҳроб Бердиевнинг жуда жиддий жароҳат олганликлари ниҳоятда ачинарли бўлди. Уларнинг соғлиги қандай? Бу савол эса барчани қизиқтиряпти ва табиийки, Бердиев билан Норбеков борасида футболга бефарқ бўлмаган инсонлар ташвишдалар.

“Қўқон-1912” клуби матбуот хизмати раҳбари Акромжон Мамадалиев sports.uz сайтига Бердиев билан Норбековнинг ҳолати бўйича қуйидагиларни маълум қилди:

-  Кеча ғалаба қозонганимиз яхши бўлдию, аммо иккита етакчи ўйинчимизнинг жиддий жароҳат олишгани кайфиятимизни бузди. Ўйиндан кейинги хурсандчилигимиз ҳам жойига тушмади.

Суҳроб Бердиевнинг жароҳат олган видеолари чиқди, жуда хунук кўринди. Аслида эса, Шоҳназар Норбековнинг жароҳати уникидан-да, оғирроқ бўлганди. Сабаби, унинг жароҳати бош мияга бўлган. Дастлабки ташхис натижасида унга бош мия суягининг синиши, деган тўхтамга келинган.

Шифокорларимиз кечадан бери ҳар иккала футболчимизнинг соғликлари билан курашмоқдалар. Ҳозир ҳам улар билан мунтазам алоқадамиз. Норбеков анча ўзига келган. Суҳробнинг эса оёғи синган. Бердиев Тошкентга жўнатилди. Бугун чуқурлаштирилган тиббий кўриклардан сўнг иккаласини ҳам якуний ташхиси айтилади. Бу борада шифокоримиз баёнот беради ва сайтимизга шифокоримиз  билан суҳбат қилиб қўямиз.

Кўплаб мухлислар ҳам футболчиларимизнинг соғлиги борасида қайғуришяпти. Тўғриси, жароҳат одамнинг юраги кўтара олмайдиган даражада бўлган. Очиғи, шахсан мен Суҳроб Бердиевнинг оёғини кўриб йиғлаб юборай дедим. Агар ўша вазиятда уни устида бўлсангиз ўзингизни ушлаб тура олмасдингиз. Аллоҳ уларга шифо берсин, - деди клуб матбуот хизмати раҳбари.