К-1: Яккасарой туман прокурори кубоги ғолиблари аниқланди

Бугун Тошкент шаҳри Яккасарой туманида жойлашган “Яккасарой” спорт мажмуасида К-1 бўйича профессионал жанглар ташкил қилинди. Ўзбекистон К-1 федерацияси Тошкент шаҳар бўлими ҳамда Яккасарой туман прокуратураси томонидан ташкил қилинган ушбу жанг кечаси жуда шиддатли ва қизиқарли тарзда ўтди.

Яккасарой туман прокурори соврини учун ўтказилган ушбу кечада 7 та жуфтлик ғолиблик учун жанг қилди. Марказий тўқнашув +90 кг вазн тоифасида “Оқтепа” клуби аъзоси Сулаймон Солиҳов ва “Toni Pro” вакили Улуғбек Давлатов ўртасида бўлиб ўтди. Мазкур қарама-қаршиликда Солиҳов иккинчи раундда техник нокаут эвазига ғалаба қозонди.

Шунингдек, 67 кг вазнда Сардор Ниғматов Аҳрор Қурбоновни, 63,5 кгда Шерзодбек Ҳожимуродов Аслиддин Низомиддиновни, 81 кгда Мурод Аҳмедов Давлатбек Мараимовни, 61 кгда Ҳасан Набижонов Жалол Шавкатовни, 63 кгда Акмал Тўлаганов Ислом Султоновни, 86 кгда Нурсултон Шералиев Фаррух Зокировни мағлуб этди.

Ғолибларни Яккасарой тумани ҳокими Анвар Сайфутдинов, Миллий Гвардия қўмондони, қўл жанги федерацияси раиси генерал-майор Рустам Жўраев, Тошкент шаҳар прокуратураси бўлим бошлиғи Умар Файзиев, Яккасарой туман прокурори ўринбосари Шарофиддин Юсупов ҳамда турнирнинг асосий ташкилотчилари Ўзбекистон аралаш жанг санъатлари федерацияси раиси ўринбосари Мурод Хонтўраев, Ўзбекистон К-1 федерацияси Тошкент шаҳар бўлими раҳбари Ҳожиакбар Ҳакимов ҳамда Яккасарой тумани прокурори Нилуфар Аллабергенова эсдалик совғалар ва кубок билан тақдирлади.

Бир сўз билан айтганда, мазкур жанг кечаси ажойиб тарзда ташкил этилди.

Биз ушбу турнирни ташкил қилишда бош-қош бўлган Яккасарой тумани прокурори Нилуфар Аллабергеновани фикрлари билан қизиқдик.

"Биласизми, Юртбошимиз томонидан илгари сурилган беш ташаббус мен учун дастуриламал бўлди. Яъни, унинг иккинчи йўналиши - ёшларни жисмоний чиниқтириш, уларнинг спорт соҳасидаги қобилиятини намоён қилишлари учун зарур шароитлар яратишга йўналтирилганлиги менда шундай турнирларни ўтказиб, юртимиз спортчиларини қўллаб-қувватлаган ҳолда, уларнинг халқаро ареналарда ватанимиз шарафини муносиб ҳимоя қилишларига оз бўлса-да ҳиссамни қўшишга туртки бўлди. Бундан аввал, дзюдо ва кураш бўйича ҳам шундай турнирларни ўтказган эдик.

Бу сафар К-1 йўналишида ташкил қилдик. Албатта, бу борада Ўзбекистон аралаш жанг санъатлари федерацияси раиси ўринбосари Мурод Хонтўраев, Ўзбекистон К-1 федерацияси Тошкент шаҳар бўлими раҳбари Ҳожиакбар Ҳакимов ва барча мен билан елкадош бўлганларга ўз миннатдорлигимни билдириб қоламан. Ўйлайманки, турнир жуда ажойиб ўтди. Ташриф буюрган меҳмонлар ва мухлисларга ҳам ушбу жанглар ёққанлигини юз-кўзларида кўриш мумкин эди. Насиб қилса, ушбу турнир анъанавий тарзда ўтказилади, деган умиддаман!" , - деди Аллабергенова.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар