Карло Анчелотти Хави ва Мессига "ответ" қайтарди

"Реал" бош мураббий Карло Анчелотти Европа Чемпионлар лигаси 3-тури доирасидаги "Шахтёр"га қарши баҳсдан олдин матбуот анжуманида қатнашди. Италиялик мутахассис яқинда "Барселона" устози Хави ва ПСЖ ҳужумчиси Лео Мессининг фикрларига муносабат билдирди. Аввалроқ, аргентиналик футболчи ва каталонияликлар мураббийи ЕЧЛда ҳар доим ҳам яхши жамоалар ғалаба қозонавермайди қабилида гапирганди.

"Хави ва Месси Чемпионлар лигасида ҳар доим ҳам энг яхши жамоа ғолиб чиқмаслигини айтишди? (кулади) Бу гаплардан ҳайратга тушдим. Ҳар доим энг яхши жамоа ғалаба қозонмайдими? Бу борада менинг фикрим йўқ. Улар бу каби фикр билдирганидан кўра Чемпионлар лигасида энг зўри ғалаба қозонади деса яхшироқ бўлар эди.

Чемпионлар лигасида, умуман олганда бутун футболда ким гол урса, ўша ғалаба қозонади . Шубҳасиз, ўтган мавсум бу борада энг зўри "қироллик клуби" эди. Шунингдек, бир мавсумда ПСЖ, "Челси", "Сити" ва "Ливерпул"ни мағлуб этдик. Буни тасодиф деб аташ қийин”, - деди Карло Анчелотти “Шахтёр”га қарши ўйин олдидан ўтказилган матбуот анжуманида.