Колумбиялик футболчи Ўзбекистон устидан қозонилган ғалаба ҳақида фикр билдирди

Жаҳон чемпионатининг гуруҳ босқичи доирасидаги учрашувдан сўнг Колумбия терма жамоаси ярим ҳимоячиси Густаво Пуэрта Ўзбекистон устидан қозонилган ғалаба ҳақида фикр билдирди.

У ФИФА матбуот хизматига берган интервьюсида мураббий ундан доим ҳимояда янада агрессив ўйнашни ва имконият бўлиши билан ҳужумга ўтишни талаб қилишини айтди. Пуэртанинг таъкидлашича, у ушбу ўйинда ўз вазифасини муносиб бажарган, жамоадошлари ҳам майдонда катта ҳажмда ишлаган.

- Мураббий мендан ҳар доим ҳимояда қаттиққўл бўлишимни ва доим олдинга интилишимни сўрайди. Ўйлайманки, мен шунга ҳаракат қилдим – Лерма, Арьяс ва бутун жамоа билан бирга. Ярим ҳимоя чизиғида яхши ишладик.

Иккинчи гол эпизоди пайтида Лерма менга яқинлашиб, тўпни қайтариб олишга ёрдам берди, мен эса Лучога (Луис Диасга) пас бердим. Ундан кейинги вазият ҳақида кўп нарса айта олмайман. Бу жаҳон чемпионатидаги илк голли узатмамни амалга оширганимдан жуда хурсандман, — дея қўшимча қилди ярим ҳимоячи.

Эслатиб ўтамиз, Колумбия терма жамоаси Ўзбекистонни 3:1 ҳисобида мағлуб этди ва "К" гуруҳида ягона пешқадамга айланди. Кейинки турда колумбияликлар Конго Демократик Республикаси терма жамоасига қарши майдонга тушади. Африка вакили биринчи турда Португалияга қарши баҳсда 1:1 ҳисобида дуранг қайд этган эди.