Конор МакГрегорни жангга чорлаган ўзбек жангчисига қандай жавоб қайтарилди?

Ўзбекистонлик кикбоксинг устаси ва таниқли актёр Муҳаммадали Тоштурғунов UFC собиқ чемпиони Конор МакГрегорни жангга чорлаб, ашула ижро этганидан хабарингиз бор. Ушбу чақириқ мухлислар орасида турлича талқин қилинди. Кўплар бу чорловга салбий муносабатда бўлган бўлса, қўллаб-қувватлаганлар ҳам топилди. Биз атлетимизга ана шу масалага аниқлик киритиш учун мурожаат қилдик.

- Муҳаммадали, Конор МакГрегорни жангга чорлаганингиз анчагина шов-шув бўлди. Аслида, бу фикр қандай пайдо бўлганди?

- Тўғриси, бу ҳазилдан бошланиб кетган эди. Яъни, “Asian Fight” турнирида Конор билан жанг қила оласизми, деган савол беришди. Шунда ана шу ғоя туғилди.

- Лекин ашулангиз мухлислар томонидан турлича қабул қилинди...?

- Тўғри, буни ўзим ҳам кузатдим. Очиғи хафа бўлдим. Кўплаб юртдошларимиз устимдан кулиб, ҳақоратлашгача боришди. Уларнинг ўрнида мен бўлганимда омадини берсин, деб яхши тилаклар билдирардим. Чунки, ватандошимни қўллаб-қувватлардим... ирландияликни эмас!

- Мазкур уринишингиз бирор натижа бердими? Яъни, Конор томониданми ёки унга яқин бўлган инсонлар муносабат билдирдими?

- Бироз натижа берди, деб айта оламан. Айнан, Конор ёки унинг яқинлари томонидан муносабат билдирилмаган бўлса-да, АҚШ телеканалларида МакГрегорни ушбу спортчи жангга чорлади, қабилида ашуламни намойиш этибди.

- Демак, ҳали ҳам у билан жанг қилиш истагидан чекинмоқчи эмассиз?

- Аксинча, ниятим яна-да жиддийлашди. Насиб қилса, бунга қачондир эришаман, деб ўйлайман.

- Мақсадингиз амалга ошишига тилакдошмиз!

- Катта раҳмат!