Корейслар билан бошлаб корейслар билан тугатди ёхуд "Андижон"нинг бир кунда ўтказган иккита ўйини ҳақида

“Андижон”нинг Анталиядаги сўнгги назорат учрашувлари ҳам бўлиб ўтди. Олдин хабар қилиб ўтганимиздек, “Бургутлар” бир кунда иккита ўйин ўтказиши режалаштирилганди. Дастлабки учрашув Руминиянинг “Корвинул “Хундеора” жамоасига қарши кечди. Аслида бу баҳс андижонликлар учун ёмон бошланмаганди. Лекин жамоанинг ўйлаган режалари ушбу ўйинда амалга ошмади. Аксига олиб рақибнинг уюштирган аксарият ҳужуми билан гол билан якунланаверди ва натижада йирик 0:5 ҳисоби қайд этилди.

Бир кунда иккита учрашув ташкиллаштирилгани боис мураббийлар штаби иккала беллашув учун асосий таркибни аниқлаб олишганди. Агар вазиятлардан бирини голга айлантирганларида бундай ҳисоб қайд этилмасди. Масалан, биринчи бўлимда Фарҳод Соҳибжоновда қулай имконият бўлди. Жарима майдони ичида йўллаган аниқ зарбасини руминиялик посбон зўрға оёқлари ёрдамида бартараф қилиб қолди. Юқорида таъкидлаганимиздек, “Корвинул”нинг ҳужумлари самарали чиқаверди ва бунда албатта омад ҳам улар томонда бўлганини таъкидлаш жоиз. Аслида эса мана шундай натижалар албатта ижобий томондан хизмат қилиши табиий. Қолаверса, бу назорат учрашуви ва унда мураббийлар футболчиларнинг ўйин амалиётини оширишмоқда ҳамда турли тактик услубларни қўллаб кўришяпти.

Куннинг иккинчи ярмидаги учрашув Жанубий Кореянинг “Канвон” клубига қарши бўлиб ўтди. Таъкидлаш жоизки, бу баҳсда "Андижон" анча тартибли ҳаракат қилди. “Канвон” Кореянинг “Кей1” лигаси қатнашчиси. Худди бизнинг Суперлигамиз сингари. “Андижон” вакиллари тезкор рақибга қарши прессинг қўллади ва тактик юришлар орқали хавф туғдирди. "Бургутлар" биринчи бўлимда ҳисобни очишга яқин келди. Иқтидорли ярим ҳимоячи Илҳом Абдуғаниевнинг жарима майдони ичига кирмасдан йўллаган зарбаси тўсинга тегиб қайтди. Ўйиндаги асосий воқеалар танаффусдан кейин юз берди.

Иккинчи бўлимни жуда шиддатли бошлаган “Андижон” корейсларни шоширтириб қўйди ва шунга яраша тезкорлик билан гол урдилар. Стандартдан узатилган тўпни “Канвон” жарима майдони ичида Ислом Маматказин боши билан дарвозанинг пастки бурчагини аниқ нишонга олди. Бу голдан руҳланган андижонликлар яна ҳужумлар уюштиришда давом этди. Бир вазиятда жарима майдони ичида қанотдан узатилган тўпни Суҳроб Бердиев яқин масофадан йўллади-ю, аммо дарвозабон тўпни чизиқ устида қайтариб қолди. Лекин корейслар ўз ҳужумларидан бирида ҳисобни тенглаштирдилар. Шундан кейин ҳам “Андижон” футболчилари бўш келмадилар.

Бу ўйинда Хомяков жамоаси ғалабага ҳақли эди ва жуда яқин келганди. Охиригача курашган футболчилар баҳс сўнггида рақиб жарима майдони ичида кескинлик билан тўхтатилди. Аввалига Фарҳод Соҳибжонов, кейин Шерзод Эсанов очиқчасига йиқитилди. Лекин турк ҳаками негадир бу вазиятда пенальти белгилашни истамагани бизни ҳайрон қолдирди. Ҳолбуки, тўла-тўкис пенальти эди.

Шундай қилиб, ўйин дуранг билан тугади. Эътиборлиси, “Андижон” Анталиядаги йиғинини Жанубий Корея олимпия терма жамоасига қарши ўйин билан бошлаганди ва яна кореяликларга қарши учрашув билан якунладилар.

“Андижон” – “Корвинул” – 0:5 (0:2).

“Андижон” таркиби: Максим Сарраф, Илдар Маматказин, Марлен Чобанов, Абубакир Режаббоев, Иззат Абдурасулов, Асилбек Айсаров, Шерзод Эсанов, Леван Арвеладзе, Суннатилла Абдуллажонов, Фарҳод Соҳибжонов, Шаҳбоз Эркинов.

Захирадан майдонга тушганлар: Моҳир Комилов, Диёр Тоиров, Асад Ҳабибуллаев, Суҳроб Бердиев, Армин Бошняк, Илҳом Алижонов.

“Андижон” – “Канвон” – 1:1 (0:0).

“Андижон” таркиби: Игорь Литовка, Владимир Бубанья, Ислом Маматказин, Фарҳод Бекмуратов, Сардор Азимов, Абдувоҳид Ғуломов, Муҳаммадкарим Тоиров, Илҳом Абдуғаниев, Бектемир Абдуманнонов, Демир Имери, Рустам Турдимуродов.

Захирадан майдонга тушганлар: Фарҳод Соҳибжонов, Суҳроб Бердиев, Иззат Абдурасулов, Шерзод Эсанов, Илҳом Алижонов.