Криштиану Роналду Португалия терма жамоасидаги фаолиятини қачон якунлашини айтди

Португалия терма жамоаси етакчи ҳужумчиси Криштиану Роналду 2026 йилги жаҳон чемпионати 1/8 финал босқичи олдидан миллий жамоадаги фаолиятини якунлаш ҳақидаги саволга жавоб берди. Ушбу босқичда португаллар Испания терма жамоасига қарши майдонга тушади.

"Мен 18 ёшимда терма жамоага қўшилган кундан бери вазият шундай бўлган ва бу ўзгармайди. Мен доим термаданман, ҳам руҳан, ҳам жисман. Майдонга тушаманми ёки йўқми — барибир жамоадаги ўрним муҳим бўлиб қолаверади. Пенсияга чиқишимни, бир неча йил аввал айтганимдек, фақат ўзим хоҳлаган пайтда қиламан. Сиз истаганингизда эмас. Бир хил саволни қайта-қайта бериш — вақтни беҳуда сарфлаш. Мен бу мавзу атрофида ортиқча шов-шув бўлишини истамайман. Энг муҳими — эртага яхши ўйнаш ва кейинги босқичга чиқишимизга ишониш", — дея Роналдунинг сўзларини келтиради AS нашри.

Эслатиб ўтамиз, 2026 йилги футбол бўйича жаҳон чемпионати 11 июндан 19 июлга қадар АҚШ, Канада ва Мексика ҳудудида ўтказилмоқда. Амалдаги жаҳон чемпиони — Аргентина терма жамоаси. 2022 йилги жаҳон чемпионати финалида аргентиналиклар Францияга қарши майдонга тушган эди. Асосий вақт 3:3 ҳисобида якунланган, пенальтилар сериясида эса Аргентина 4:2 ҳисобида ғалаба қозонган.