Легионеримиз премьер-лиганинг энг қиммат ўйинчисига айланди!
Трансферларга ихтисослашган Transfermarkt портали Қозоғистон премьер-лигасининг энг қиммат футболчиларини аниқлади.
Унга кўра, “Тобол” шарафини ҳимоя қилаётган ҳужумчимиз Игорь Сергеев чемпионатнинг энг қимматбаҳо футболчиси бўлди. Сайт мутахассислари ўзбекистонлик тўпурарни 1,7 миллион еврога баҳолаган.
Янгиланган рейтингга кўра, 29 ёшли футболчимизнинг трансфер суммаси ўзгаришсиз қолган. Аввалги рўйхатда ундан баландда жойлашган “Қайрат”нинг польшалик легионери Яцек Гуральски 200 минг еврога арзонлади ва унинг трансфер суммаси 1,6 миллион еврони ташкил қилмоқда.
Шунингдек, энг қиммат футболчилар рейтингида кейинги поғоналарни эгаллаб турган “Қайрат”нинг гвинеялик ҳужумчиси Хосе Канте ҳамда “Астана”нинг либериялик форварди Муҳаммад Камара ҳам 100 минг еврога арзонлаб, ҳар икки ўйинчининг трансфер нархи 1,4 миллион еврога тенглашди.
Қозоғистон чемпионатининг энг қиммат футболчисига айланган Игорь Сергеев 2021 йилнинг бошида ушбу мамлакатда тўп тепмоқда. “Пахтакор”дан “Актобе”га эркин агент сифатида қўшилган ҳужумчимиз ярим мавсумдан кейин ўз олдига катта мақсадларни қўйган “Тобол”га кўчиб ўтди.
Игорь Сергеев ўтган йили кустанайликлар билан бирга Қозоғистон чемпиони бўлди.
Бу мавсумда ҳам Игорь жамоасининг асосий тўпурари ҳисобланади. Ҳамюртимиз премьер-лигада 12 та учрашув ўтказиб, рақиблар дарвозасини беш маротаба ишғол қилди.
Сергеев “Пахтакор”дан ташқари Хитойнинг “Бейцзие Гоань”, Бирлашган Араб Амирликларининг “Ал-Зафра” жамоаларидан ҳам фаолият юритган ва бу мамлакат чемпионатларида ҳам гол уришга муваффақ бўлган.
Тажрибали ҳужумчи 2013 йилдан бери Ўзбекистон миллий терма жамоаси аъзоси ҳисобланади ва мамлакатимиз бош жамоасида 62 та учрашувда 19 та голга муаллифлик қилди.
Қозоғистон премьер-лигасида тўп тепаётган яна икки футболчимиз – Жасур Жалолиддинов ва Одилбек Абдумажидовнинг трансфер суммасида ҳам ўзгариш бўлди.
“Қайрат”да ўйнаётган ҳужумкор футболчимиз Жасур Жалолиддиновнинг трансфери 100 минг еврога арзоланлаб, айни пайтда унинг нархи 550 минг еврога баҳоланмоқда. 20 ёшли футболчимиз Қозоғистон премьер-лигасидаги дебют мавсумида етти марта майдонга тушиб, ҳали самарали кўрсаткич қайд этгани йўқ. Унинг “Қайрат” билан ижара шартномаси шу йилнинг 31 декабригача тузилган.
“Ордабаси”да тўп тепаётган марказий ҳимоячи Одилбек Абдумажидовда сезиларли ўсиш кузатилмоқда. Қозоғистонга келганидан бери нархи 100 минг еврога кўтарилган легионеримиз ҳозир 250 минг еврога баҳоланган.
Бекободнинг “Металлург” жамоасидан “Ордабаси”га ўтган ҳимоячимиз премьер-лиганинг ўнта баҳсида қатнашиб, ҳимоядаги вазифаларини уддалашдан ташқари, бир марта жамоадошларига гол уриш имкониятини яратиб берди.
Фикрлар