Лэмпарднинг “Челси” футболчилари учун шафқатсиз жазолари

Ёзда Лэмпард “Челси”нинг мураббийлик постига келгач, қатъий қоидаларни ишлаб чиқди. Мавсум бошидаёқ клуб базасида жарималар рўйхати ёзилган эди ва тагига Френкнинг имзоси қўйилганди.

Энг катта жарима 20.000 фунт бўлиб, бу машғулотга кечиккан футболчилардан ундирилади. Бу жарима фақатгина ҳамма йиғилиши мажбурий бўлган машғулотларга кечикиш учун олинади. Бу 1 соат кечикиш учун. Кейинги ҳар 15 минутга 2500 фунт қўшилиб бораверади. Яна бир жарима машғулотолди тайёргарлик кўриш учун залга келмаганликка ундирилади. Бу 1000 фунтни ташкил этади.

Иккинчи жарима 10.000 фунт бўлиб, бу футболчи ўзини ёмон ҳис қилаётганини айтмаса ёки кела олмаслигини машғулотлар бошланишидан бир ярим соат олдин айтса олинади.

Агарда футболчи жамоадошлари билан бир автобусда эмас бошқа машинада кетса ва бу ҳақида мураббийни огоҳлантирмаса 5 минг фунт жарима тўлайди. Жамоавий ёки хайрия тадбирларига қатнашмаслик ҳам худди шунча жарима тўлашга олиб келади.

Тиббий кўрикка кечиккан футболчилар 2,5 минг фунт жаримага тортилади, ошхонада ёки жамоавий йиғилиш пайтида телефон жирингласа минг фунт тўлашга тўғри келади.

Агарда футболчилар клуб базасида жамоа формасида юришмаса минг фунт тўлашади. Жамоавий мажлисга кеч қолган эса 500 фунт тўлаши керак бўлади.

Жарималар икки ҳафта ичида тўланиши шарт. Акс ҳолда жарима 2 бараварга ортади. Тўланаётган жарималарни шахсан Лэмпарднинг ўзи ва ёрдамчилари кузатиб боришади. Барча пуллар жамоа тадбирлари ва хайрия ишларига сарф қилинади.

Лэмпард жамоадаги ёши катта футболчилар ҳақида: “Шубҳасиз, ёши катта футболчиларда масъулият бўлади. Чунки ёш футболчилар уларнинг ҳаракатларидан ўрнак олишади ва уларга ўхшашга интилишади. Мен диктатор бўлмоқчи эмасман, лекин тажрибали футболчилардан илтимос қилардимки, ҳар бир ишга масъулият билан қарашларини” – деган эди.

Жамоа яна бир қанча қоидаларни ишлаб чиқди:

• Футболчилар аниқ бир вазнда бўлиши керак ва ортиқча вазн тўпламасликлари керак. Агарда бу қоида бузилса жаримага тортилади.
• Агентлар клуб базасига киритилмайди. Қачонки, расмий ишлар билан келишсагина базага киритилиши мумкин.
• Ошхона машғулотлар бошланишидан 1 соат олдин ёпилади. Агарда кечиксанг ва нонушта қилолмаган бўлсанг, бу сенинг муаммоинг.
• Дам олиш кунлари футболчилар қаергадир борадиган бўлишса, бу ҳақида раҳбариятни огоҳлантириб қўйишлари керак. Бу қоида бевоситда допинг-офитсерларга боғлиқ ҳисобланади.

Лэмпард жамоада ўзига хос қоидаларини ўрнатди ва жамоа ҳам шунга кўниккан ҳолда ҳаракат қиляпти. Балки, қоидалар қатъий туюлар, аммо бу ҳаммаси жамоа фойдасига ишлайди. Зеро, тартиб бор жойда ўсиш бўлади.