Левандовскига “Барса” таклифи ёқмади, бошқа вариант чиқди

“Барселона” клуби мутасаддилари тўпурар ҳужумчи Роберт Левандовски билан шартномани узайтириш бўйича келишувга эриша олмади. Бу ҳақда инсайдер Фабрицио Романо хабар берди.

Маълум қилинишича, каталонияликлар футболчига маоши камайтирилган ҳолда бир йиллик янги шартнома таклиф қилган. Бироқ бу шартлар Левандовскини қониқтирмади.

Манбага кўра, футболчининг агенти яқин вақт ичида Италияга бориб, Серия А клублари вакиллари билан учрашади.

Чунки “Ювентус” ҳужумчига энг катта қизиқиш билдираётган клуб бўлиб турибди. Бироқ туринликлар таклифи футболчини қанчалик қониқтириши ҳозирча номаълум.

Левандовскининг амалдаги келишув 30 июнь куни тугайди. Польшалик форвардга Саудия Арабистони клубларидан даромадли таклифлар бор. Аммо 37 ёшли футболчи фаолиятини топ-лигаларда давом эттирмоқчи.