"Ливерпуль" мундиалнинг энг ёрқин кашфиётларидан бирини олади

«Ливерпуль» Мексика чемпионатида тўп суриб келаётган «Тихуана» клуби ярим ҳимоячиси Хильберто Морага жиддий қизиқиш билдирмоқда. Бу ҳақда TEAMtalk нашри хабар берди.

2026 йилги жаҳон чемпионатида ёрқин ўйини билан эътибор қозонган Мора мусобақанинг энг ёш иштирокчисига айланди. 17 ёшли футболчи 1/8 финалгача етган Мексика терма жамоасининг етакчи ўйинчиларидан бири бўлди. Мексика ушбу босқичда Англияга 2:3 ҳисобида мағлуб бўлди.

Манба маълумотларига кўра, «Ливерпуль» аллақачон футболчининг вакиллари билан боғланиб, эҳтимолий трансфер шартлари ва ўйинчининг ўзи бу борадаги фикрини ўрганмоқда. Ҳозирча музокаралар дастлабки босқичда, келишувга эришишга эса ҳали анча бор.

Яқинда Мора «Тихуана» билан шартномасини 2029 йилгача узайтирди. Бироқ келишувда унинг келажакда Европа клубига ўтишига ёрдам берадиган махсус банд ҳам мавжуд. ФИФА қоидаларига мувофиқ, ёш ярим ҳимоячи хорижий жамоага фақат 18 ёшга тўлганидан сўнг, яъни 2026 йил октябридан кейин қўшила олади.

Мексикалик футболчига «Реал», «Барселона», «Манчестер Сити», «Челси» ва «Арсенал» каби гранд клублар ҳам қизиқиш билдирмоқда. Шу билан бирга, манба таъкидлашича, ўйинчини анча вақтдан бери кузатиб келаётган «Манчестер Юнайтед» уни имзолаш учун фаол курашга киришиши эҳтимоли паст деб баҳоланмоқда.