"Ливерпуль" ҳужумчиси АПЛнинг бошқа бир клубига ўтиши мумкин

"Теамталк" нашрининг маълумотига кўра, "Ливерпуль" ҳужумчиси Дарвин Нуньеснинг ёзги трансфер ойнасида клубни тарк этиши эҳтимоли ортиб бормоқда. Уругвайлик форвардга иккита Премьер-лига клуби жиддий қизиқиш билдирмоқда. 
 
25 ёшли ҳужумчи Юрген Клопп бошчилигида муҳим ўйинчилардан бири бўлган, аммо Арне Слот қўл остида асосий таркибдан мустаҳкам ўрин эгаллашда қийинчиликларга дуч келмоқда. Жорий мавсумда у барча мусобақаларда атиги 7 та гол уришга муваффақ бўлди ва бу унинг жамоадаги келажагини ноаниқ ҳолга келтирди. 
 
Аввалроқ "Атлетико Мадрид" Нуньесга қизиқаётгани ҳақида хабарлар тарқалган эди. Диего Симеоне унинг ўйин услубини юқори баҳолайди ва "матрасчилар" ҳозирда ушбу трансферни молиявий жиҳатдан амалга ошириш имкониятларини ўрганмоқда. Бундан ташқари, мадридликлар билан бирга, "Ноттингем Форест" ва "Ньюкасл Юнайтед" клублари ҳам ҳужумчи учун энг асосий номзодлар рўйхатидан жой олмоқда. 
 
Маълумот ўрнида, 25 ёшли форвард жорий мавсум мерсесайдликлар сафида 40 та учрашувда майдонга тушиб, 7 та гол ва 7 та голли узатмага муаллифлик қилган. Унинг клуб билан шартномаси 2028 йилгача мўлжалланган бўлиб, Тransfermarkt порталидаги нархи 50 миллион евро деб баҳоланмоқда.