"Ливерпуль" ҳужумчисига нарх белгилади

Дарвин Нунес ёзги трансфер ойнасида "Ливерпуль" клубини тарк этиши мумкин.

Бен Жейкобснинг хабарига кўра, инглиз клуби уругвайлик ҳужумчини камида 70 миллион еврога баҳоламоқда — айнан шунча миқдорда таклифни "Ан-Наср" қишки трансфер ойнасида берган, бироқ ўшанда келишув амалга ошмаган. Бўлиб ўтиши мумкин бўлган трансфер суммаси футболчининг статистик кўрсаткичларига ҳам асосланади: асосий таркибда бошланган 49 ўйинда Нунес 25 та гол ва 13 та голли узатмага муаллифлик қилган.

Саудия Арабистонига кўчиб ўтиш ҳали ҳам мумкин бўлган вариантлардан бири бўлиб қолмоқда, бироқ футболчининг ўзи фаолиятини Европанинг топ-лигаларидан бирида — Ла Лига ёки А Серияда давом эттиришга моил. Қизиқувчилар қаторида Мадриднинг "Атлетико" клуби тилга олинмоқда. Аввалроқ "Ал-Ҳилол" ҳам Нунесга қизиққан, уни клуб ўртасидаги жаҳон чемпионатига кучайтирма сифатида кўрган эди, бироқ мусобақа учун рўйхатга олиш ойнаси аллақачон ёпилган.

Якунланган АПЛ мавсумида Нунес 30 та ўйинда майдонга тушиб, 5 та гол урди.