“Ливерпуль” юлдузи суперклубдан таклиф олди

Германиянинг машҳур Bild нашри мамлакат чемпиони “Бавария” жамоа тўпурари Роберт Левандовски ўрнига ундан кам бўлмаган ҳужумчи топганини маълум қилди.

Мюнхенликлар сенегаллик ҳужумчи Садио Мане трансферини сўраб, “Ливерпуль” мутасаддиларига мурожаат қилгани айтилмоқда.

Маненинг ливерпулликлар билан келишуви бир йилдан кейин якунланади. Томонлар ҳамкорликнинг янги шартлари бўйича ҳали бир қарорга келмади. “Бавария” бундан  фойдаланиб, 30 ёшли юлдузни ўз сафига қўшиб олмоқчи.

Шу ўринда, Садиога “Барселона” ҳам даъвогарлик қилаётганини айтиш жоиз.

Мане учун мавсум омадли давом этмоқда. У ички ва халқаро мусобақаларда 48 марта майдонга тушиб, ўз ҳисобига 22 та гол ва бешта ассист расмийлаштирди.

Шунингдек, Седио Мане Сенегал терма жамоаси таркибида Африка Миллатлари кубоги мусобақасида бош соврин соҳиби бўлди.