Ўзбекистонга қимматли маслаҳат: Португалияни қандай тўхтатиш мумкин?
Ўзбекистонлик машҳур футболчи ва мураббий Андрей Фёдоров россиялик журналистлар билан бўлган суҳбатда миллий терма жамоамизнинг мундиалдаги иштироки, хусусан, Португалия қарши бўладиган ўйини ҳақида тўхталди.
Sports.uz портали ушбу интевьюнинг Ўзбекистон ва Португалия баҳсига оид қисмини ўқувчилар эътиборига ҳавола қилади.
– Ўзбекистоннинг навбатдаги ўйини Португалияга қарши бўлади. У ерда кимдан кўпроқ эҳтиёт бўлиш керак? Ахир уларда деярли ҳар бир футболчи юлдуз.
– Ҳар қандай футболчидан эҳтиёт бўлиш лозим. Бу энди бошқа ўйин, бошқа баҳс. Ҳар бир ўйинчидан кутилмаган қарор чиқиши мумкин, бежизга уларни “Европанинг бразилияликлари”, деб аташмайди.
Лекин менда шундай ҳис бор: агар Ўзбекистон Колумбияга қарши ўйнаганидек интизомли ҳаракат қилса, айниқса ўйин бошида гол ўтказиб юбормаса, очко олиш имконияти бор. Биз кучли жамоалар ҳақида гапиряпмиз, аммо ўйин куни кимдир яхши формада бўлмаслиги, кимдир ўзини ёмон ҳис қилиши мумкин. Ҳаммаси майдонда ҳал бўлади. Ўйин бошланадиган вақтда ҳаво қандай бўлади, майдоннинг ҳолати қанақа ҳолатга келади, буларнинг барчаси жуда катта аҳамиятга эга. Бу омилларни инкор этиб бўлмайди.
– Агар сизда Португалияга қарши ўйин олдидан футболчиларга маслаҳат бериш имконияти бўлса, нима деган бўлардингиз?
– Мен уларга сабр қилишни маслаҳат берган бўлардим. Сабр қилиш ва яна сабр қилиш. Бош мураббий танлаган йўлдан оғишмаслик. Бир дақиқа ҳам режадан четга чиқмаслик.
– Португалия мундиални Конго Демократик Республикаси билан 1:1 ҳисобида дуранг ўйнаб, омадсиз бошлади. Уларнинг ўйинига қандай баҳо берасиз? Бундай натижанинг объектив сабаблари борми?
– Португалия, Испания ва бошқа Европанинг топ-терма жамоалари таркибида мавсум давомида жуда кўп ўйин ўтказадиган футболчилар тўпланган. Менимча, турнир олдидан уларга кўпроқ дам олиш имконияти берилган ва ҳозир эндигина ўйин ритмига кириб келяпти. Балки шу омил таъсир қилгандир.
Жуда кўп кучли терма жамоалар биринчи турларда ёрқин футбол намойиш эта олмади. Лекин аста-секин, ишонаманки, маҳоратли жамоалар ўз сўзини айтади. Португалияда шунчаки гол уриш ўхшамади, холос.
– Криштиану Роналду ҳақида жуда кўп ёзишмоқда ва гапиришмоқда. Унинг ҳозирги терма жамоадаги ролини қандай баҳолайсиз?
– Рақиблар уни ўйиндан бутунлай узиб қўйишди. Кўринишидан, айнан шунга тайёргарлик кўришган ва бу уларнинг қўлидан келди. Ҳозир кўпчилик Португалия Роналдусиз тезроқ ўйнайди, жамоа усиз жонлироқ кўринади, деб ёзмоқда. Бу ҳақда қатъий фикр билдириш қийин. Ахир бундай футболчини қандай қилиб таркибдан чиқариш мумкин? У майдондаги мураббийдек.
– Сизнингча, Ўзбекистон учун гуруҳдан чиқиш ҳақиқий вазифами? Энди ҳатто учинчи ўрин ҳам плей-оффга чиқиш имконини бериши мумкин.
– Албатта, бу ҳақиқий вазифа. Лекин, ростини айтсам, Португалиянинг Кабо-Верде билан дуранг ўйнаши бизнинг вазифамизни бироз қийинлаштирди. Шу жиҳатдан энди осон бўлмайди. Нега? Чунки Ўзбекистонни олдинда иккита жуда оғир ўйин кутмоқда. Энди чиройли футболнинг ўзи етарли эмас, аниқ натижа керак бўлади. Бу ерда бош мураббийнинг маҳорати биринчи ўринга чиқади – у футболчиларни қандай руҳлантиради, бундай гигантларга қарши қандай футбол танлайди. Ҳозирдан бирор нарсани башорат қилиш қийин.
Аммо айнан Колумбияга қарши ўйинга қараб, мен имкониятлар борлигини кўряпман. Ҳеч бўлмаса, шунга умид қиляпман. Улар хоҳ тонгги соат 5:00 да, хоҳ тунги соат 3:00 да ўйнасин, мен уларнинг кейинги босқичга чиқишини истайман ва бунинг учун ухламасликка ҳам тайёрман.
Ўзбекистон Португалияни ютиши мумкин, Роналду рақибнинг энг катта муаммоси!
Майкл Оуэн Ўзбекистон ўйинига муносабат билдирди
Голдан кейин Файзуллаевга мурожаат бўлди
Португалия юлдузи Ўзбекистон билан бўладиган тўқнашув ҳақида қаттиқ гапирди
Ана тезлик! Ҳусанов Мбаппедан анча ўзиб кетди!
Шомуродов бизга гол урган! Яна бир суперклуб Элдор учун курашга қўшилди
Эксперт: Ҳусанов ҳозир Роналдудан кучли!
Файзуллаев бир гол билан колумбиялик қизлар ёқимтойига айланди
Ўзбекистоннинг мағлубиятдан кейинги иши мексикаликларни ҳайратга солди
Фикрлар