"Локомотив" бош мураббийи: "Менимча, трансферлар шу билан етарли бўлса керак"

Про лигада ҳам кураш қизғин кечяпти. Тошкентнинг “Локомотив” клубини биринчи даврани 10 та ўйиндан сўнг 8 ғалаба ва 2 дуранг қайд этиб, 26 очко билан якка пешқадам сифатида якунлаганидан хабарингиз бор.

“Темирйўлчилар” айни пайтда ёзги йиғинни ўтказишяпти ва бу орқали мавсумнинг иккинчи қисмига муносиб тайёрланишга эътибор қаратишган. Жамоа бош мураббийи Денис Коростиченко “Локомотив”нинг ёзги тайёргарлиги ҳақида шундай деди:

- Тайёргарлигимиз яхши кетяпти, ҳаммаси режа бўйича. Фақат битта муаммо бор, тақвим бўйича. 11 июнь куни охирги ўйинимизни ўтказдик. Иккинчи давра 19 августда бошланади. Бизда Кубок ўйинлари бор, 2 август куни. Суперлигада иккинчи давра 27 июлдан бошланади ва кейин Кубок учрашувлари давом эттирилади. Про лига ўйинларини ҳам масалан 25 ёки 26 июлда бошласа бўларди. Мисол учун, ОКМК чемпионатда битта ўйин ўйнайди ва кейин Кубокка тайёрланади. Биз эса тўғридан-тўғри Кубок ўйинида майдонга тушамиз. Яна қайтараман: жамоамизнинг иккинчи даврага тайёргарлиги режа бўйича яхши кетяпти. “Металлург” билан назорат ўйинини ўйнадик. Яна бир ўртоқлик учрашувини “Турон” билан ўтказишимиз керак эди. Аммо улар Россиянинг Қозон шаҳрига бориб келишди. Шу сабабли бизга қарши учрашувни бекор қилишди. Лекин бизда яна иккита ўйин бор.

Шу билан бирга таркибда у қадар катта ўзгаришларга қўл урилгани йўқ. Таркибнинг асоси сақлаб қолинган ва уларнинг олдига икки нафар Суперлигада ўйнаган ўйинчилар қўшилишди. Ўз ўрнида “Локомотив” бош мураббийи шу хусусида ҳам тўхталиб ўтди.

- Янги футболчилардан иккита келди. Мурод Тошматов билан Абубакр Турдиалиев қўшилишди. Иккита ёш ўйинчини ижарага бердик. Булар – Абдуалимов билан Йўлдошев. Улар йил охиригача бошқа клубда тўп суришади. Жамоамизга қабул қилинган Тошматов ҳам, Турдиалиев ҳам албатта бизга ёрдам беришади. Масалан, “Насаф”дан келган Абубакр 2-3 та позицияда ўйнай олади. Тошматов жароҳатидан қутулди. У тажрибали футболчи. Қандай ўйнашни билади, у бизга керакли ўйинчи ва жамоамизга албатта ёрдам беради.

Иккинчи даврада тезроқ керакли очколарни йиғиб олишимиз керак, бу бизнинг вазифамиз ва буни бажарамиз. Ўйлайманки, бу йўлда иккала ўйинчи ҳам “Локомотив”га ёрдам бера олади. Менимча, трансферлар шу билан етарли бўлса керак ва бу масаладаги ишни тўхтатдик. Мабодо, 1 августгача яна қандайдир номзод пайдо бўлиб қолса, ҳаракат қиламиз. Лекин ҳозиргача шу иккита янги ўйинчи етади.

Шуҳратбек Жўраев.