АҚШнинг Лас-Вегас шаҳридаги "MGM Grand" аренаси катта профессионал бокс оқшомига мезбонлик қилди. Унинг марказий жангида енгил вазн (61,2 кг) тоифасида WBC Франчисе, WBО ва WBA Супер чемпионлик камарлари соҳиби украиналик Василий Лoмаченко ва IBF йўналиши чемпиони Теофимо Лопес камарларни бирлаштирувчи жангда тўқнаш келди.12 раундлик жанг тўлиқ давом этди ва  кутилмаганда Теофимо Лопес 116-112, 119-109, 117-111 ҳисобида ғалаба қозониб, тўртта камар соҳибига айланди. Мазкур жанг бутун жаҳонда турли тортишувларга сабаб бўлмоқда. Яъни, бу тўқнашувдаги ҳакамларнинг нохолислиги борасида бонг урилмоқда.

Биз ҳам ушбу жанг тўғрисида юртимиздаги бокс мутахассисларининг фикрига қулоқ тутдик. Қуйида уларнинг мулоҳазаларини эътиборингизга ҳавола этамиз.

Зуфар Сулаймонов – мураббий

 - Аслида, бу дурангга лойиқ жанг бўлди. Жангнинг биринчи ярми Лопеснинг устунлигида ўтди. Лекин у қадар кўп аниқ зарбалар йўллай олгани йўқ. Ломаченкода аниқлик борасида натижа яхши эди. Лекин ҳакамларнинг қарорига тушунмадим. Агар, реванш жанг ўтказилса, украиналик боксчининг катта устунлик билан ютишига шубҳа қилмайман.

Марс Қўчқоров – мураббий

 - Тўғриси, Ломаченконинг жангни биринчи ярмини Лопесга тақдим этишини тактик ҳолат, деб тушунгандим. У рақибни ўрганишга кўпроқ раундларни сарф қилиб юборди. Ўша 6 ва 7- раундлардаги каби ҳаракатларини дастлабки раундларданоқ бошлаганда, бошқача жанг бўларди. Шундай бўлса-да, Ломаченконинг зарбалари Лопесникига қараганда аниқроқ бўлди. Шахсан ўзим 8 ёки 9-раундда ҳисоблаганимда Ломаченконинг 11 та зарбаси аниқ йўлланди. Лопесники эса, уч бора аниқ етиб борди. Ҳакамларнинг қарорига қаранг, биттаси 116-112, яна бири 119-109, бошқаси эса 117-111 натижани кўрсатяпти. Менимча, бу ҳакамлар бутунлай бошқа жангни кузатишган ёки уларни Лопесга бўлган ҳурмати юқори даражада экан. Якуний фикр билдирадиган бўлсам, жанг тенг курашлар остида кечгандек бўлди, лекин аниқлик Ломаченкода эди. Тўғри, ҳакамлар бизга қараганда яқинроқ ўтиради ва эҳтимол биз кўрмаган ҳолатларни пайқаган бўлишлари мумкин. Шундай бўлса-да, 119-109 берилиши мутлақо тўғри келмайди. Энди, реваншни кутамиз. Агар томонлар келиша олса, Лопес томони рози бўлса, бу жанг янада қизиқ бўлади. Агар, амалга ошса, жанг охирига етмай, Ломаченконинг ғалабаси билан тугайди.

Аброр Турсунпўлатов – мураббий

 - Ломаченко бу жангда ютқазмади. Албатта, бу менинг шахсий фикрим. У эҳтиёткорликни биринчи ўринга қўйиб, ўз вақтини бир раунд кўпроқ кутиб юборди ва сўнгги раундда ҳам имкониятни бой бериб қўйди. Шунинг эвазига Лопесга ғалаба ёзилди, деб ўйлайман. Ваҳоланки, камида дуранг бериши керак эди.

Тўлқин Қиличев – мураббий

- Натижа адолатли бўлди, деб ўйлайман. 7 раунд Лопес устунлик қилган бўлса, 5 раунд Ломаченко ютди. Албатта, бу шахсий фикрим... Ломаченкони сўнгги раундларга қадар темпни давом эттиради, деб ўйлагандим. Бироқ Лопес 12 –раундда ўзига кела олди ва жанг тақдирини ҳал қилди. Қолаверса, бошланғич раундларда Лопеснинг зарбалари хавфли ва аниқроқ бўлди. Менимча, бу вазн тоифаси Ломаченко учун эмас. У дастлабки вазнини уч марта юқорига кўтарган боксчи ҳисобланади. Шунинг учун гавда тузилиши жиҳатидан ҳам Лопесдан бироз кичиклик қилди. Шунингдек, ёш ҳам ўз сўзини айтди. Лопесдаги иштиёқ кучлилик қилди.

Сардор Раҳимов – журналист

 - Ломаченко-Лопес... Натижа адолатли бўлди. Бу жангда Лопес ғалаба қозонди. Тўғриси, Ломаченкони унчалик таний олмадим. Сўнгги раундларда бироз ўзини кўрсатди. Лопес тактик жиҳатдан жуда тўғри ҳаракат қилди. У дастлабки раундларданоқ ринг марказини эгаллаб олди ва Ломаченкони яқинлашишига, комбинациялар амалга оширишига йўл қўймади. Лопес фаолияти мобайнида 12 раундлик жангларни жуда кам ўтказганлигини инобатга олиб, қолаверса, жангнинг иккинчи ярмида украиналик боксчининг тезлаша олишини ва ўзининг жисмоний ҳолатини ўйлаб, баҳснинг ярмидан бошлаб, қорин ва жигар қисмига зарбаллар йўллай бошлади. Яъни, Ломаченкони ҳаракатсизлантиришни мақсад қилди. Ломаченко ишини бошлади, аммо бу ишга сал кечроқ қўл урди. Деярли 8-раунддан кейин ўзини кучини кўрсатишга ҳаракат қилди. Лекин кеч эди. Чунки, Лопес ишини қилиб бўлганди. Ломаченко жангга қанчалик тайёр эканлигини билмадим. Бироқ Лопес жуда зўр тайёрланган экан. Хуллас, бу тўқнашувда юқорида таъкидлаб ўтганимдек Лопес ғалаба қозонди.

Жаҳонгир Қурбонов – мураббий

 - Жанг адолатли бўлди. Албатта, Лопес ғалаба қозонди. У Ломаченконинг устун ва заиф томонларини ўрганиб чиққан ва ундан унумли фойдалана олди, деб ўйлайман. Боксда ҳар доим ҳам босим иш беравермайди. Ақл билан ишлаш керак. Бу мени шахсий қарашларим...