Луис Энрике: "Ички чемпионат биз учун асосий мақсад"

ПСЖ бош мураббийи Луис Энрике жамоасининг Лига 1 биринчи ярмидан кейин иккинчи ўринда бораётгани ҳақида фикр билдирди.

"Менимча, биз мавсумнинг биринчи қисмини яхши ўтказдик, аммо "Ланс" яхшироқ ҳаракат қилди. Кўпроқ очко жамғариш учун янада қўшишимиз керак. Бу барча жамоалар учун қийин бўлади. Биз "Ланс" ва чемпионлик учун курашаётган бошқа жамоаларнинг даражасини биламиз. Буни англаймиз ва бу бизга қўшимча мотивация беради. Имкон қадар кўпроқ ўйинларда ғалаба қозонишни истаймиз.

Чемпионат ҳар доим биз учун аниқ ва муҳим мақсад ҳисобланади. Мавсумнинг биринчи қисмида биз ПСЖнинг одатий таркибида ўйнамадик, шу сабабли футболчиларим билан жуда фахрланаман. "Ланс" ҳам ўсишга эришди. Мен фақат натижаларга эмас, балки жамоанинг ўйинига ҳам қарайман.

Яна бир бор айтаман, чемпионат биз учун жуда муҳим. Бизга барча футболчилар керак", — деди Энрике.

Ҳозирда "Ланс" парижликлардан 4 очкога олдинда. Эртага ПСЖ 17-тур доирасида "Париж" жамоасини қабул қилади.