Макс Верстаппен Формула-1 тарихида рекорд ўрнатди

"Ред Булл" пилоти Макс Верстаппен Формула-1 рекордини ўрнатди. Италия Гран-приси саралаш босқичида айланани 1:18.792 натижа билан босиб ўтган Верстаппен айланада ўртача 264.682 км/соат тезликни кўрсатди.

Аввалги рекорд Италия Гран-присида ҳам ўрнатилган - ўшанда "Мерседес" сафида иштирок этган етти карра жаҳон чемпиони Льюис Хэмилтон саралаш босқичида 1:18.887 айлана вақти кўрсатди ва ўртача 264.362 км/соат тезликка эришди.

Эслатиб ўтамиз, бугунги пойганинг биринчи қаторида Верстаппен билан "Макларен" пойгачиси Ландо Норрис учрашади. Эътиборлиси, Норрис ҳам Хэмилтоннинг аввалги натижасини ортда қолдиришга муваффақ бўлди.

Маълумот ўрнида, Монцадаги поул позиция 4 карра жаҳон чемпиони учун 45-си бўлди. Шу тариқа, Макс "Ред Булл"да энг кўп саралаш босқичида 1-ўринни қўлга киритган пилотга айланди. "Қизил буқалар" собиқ аъзоси Себастиан Веттель 44 мартта поул позицияга эга чиққан эди.