Mamlakatimizning eng kuchli para qilichbozlari aniqlandi

Xabar berganimizdek, 5-6 iyul kunlari Chirchiq olimpiya va paralimpiya sport turlariga tayyorlash markazi para qilichbozlik bo‘yicha O‘zbekiston chempionatiga mezbonlik qildi. Bugun musobaqaning final bellashuvlari o‘tkazildi va unda mamlakatimizning eng kuchli para qilichbozlari aniqlandi.

Yakuniy natijalarga ko‘ra, 1 ta oltin, 1 ta kumush va 2 ta bronza, jami 4 ta medalga sazovor bo‘lgan Qoraqalpog‘iston Respublikasi jamoasi umumjamoa hisobida 1-o‘rinni qo‘lga kiritdi. Kuchli uchlikdan esa Toshkent hamda Namangan viloyati jamoalari joy oldi.

Musobaqaning tantanali taqdirlash marosimida O‘zbekiston Milliy paralimpiya qo‘mitasi rahbariyati ishtirok etdi. G‘olib va sovrindorlar tashkilotchilar tomonidan maxsus diplom va medal bilan taqdirlandi.