«Манчестер Сити» футболчиларига Гвардиоланинг хайрлашув нутқи очиқланди

«Манчестер Сити» футболчилари билан Хосеп Гвардиоланинг хайрлашув лаҳзалари акс этган сурат ва видеолар оммага эълон қилинди. Ўн йил давомида клубни бошқариб, тарихий ютуқларга эришган испаниялик мутахассис жамоани тарк этмоқда.

Интернет тармоқларида яқинда «A Beautiful Obsession» номли ҳужжатли фильм намойиш этилди. Унда Гвардиоланинг «Манчестер Сити»даги сўнгги икки йили, жумладан, унинг жамоа билан хайрлашув жараёни ёритилган. Энг таъсирли қисмлардан бири – мураббийнинг футболчилар олдидаги сўнгги нутқи бўлди.

«Йигитлар, мен кўп гапирмайман. Якшанба куни «Манчестер Сити» бош мураббийи сифатидаги сўнгги ўйинимни ўтказаман. Сабаби оддий: ишни давом эттириш учун куч, энергия керак. Лекин ич-ичимдан биламанки, энди менда бу энергия қолмади», – дейди Гвардиола ўз нутқида.

У шунингдек, футболчиларга миннатдорчилик билдириб, расмий эълондан олдин уларни ўз қароридан хабардор қилишни муҳим деб ҳисоблашини таъкидлаган.

Хосеп Гвардиола «Манчестер Сити»ни 2016 йилдан 2026 йилгача бошқарди. Ушбу ўн йиллик давр мобайнида жамоа билан бирга 20 та совринни қўлга киритди. Улар орасида олти марта мамлакат чемпиони бўлиш ва Чемпионлар Лигасида ғалаба қозониш каби ютуқлар ҳам бор.