"Манчестер Сити"нинг яна бир футболчиси "Интер"га ўтиши мумкин

"Манчестер Сити" марказий ҳимоячиси Натан Аке яқин вақтларда "Интер" сафини тўлдириши мумкин. Бу ҳақда La Gazzetta dello Sport нашри хабар берди.

Манбанинг маълум қилишича, 31 ёшли нидерландиялик футболчини Милан клубига таклиф қилишган. Аке бўйича келишувни амалга ошириш қийин эмас, чунки ҳимоячининг "Манчестер Сити" билан тузган шартномаси яна бир йилдан сўнг ўз кучини йўқотади.

Эслатиб ўтамиз, шу кунларга қадар "Манчестер Сити"дан "Интер"га яна бир марказий ҳимоячи — Мануэль Аканджи йўл олган эди.

Натан Аке 2020 йилдан буён "Манчестер Сити" шарафини ҳимоя қилиб келмоқда. Ўтган мавсумда у жамоа таркибида 32 та ўйинда майдонга тушди, аммо гол ёки голли узатма билан ажралиб турмади.

Transfermarkt портали баҳосига кўра, футболчининг бозор қиймати 12 миллион еврони ташкил этади.