“Манчестер Сити” яна бир юлдузидан воз кечишга тайёр

“Манчестер Сити” юлдузи Бернарду Сильва фаолиятини Саудия Арабистони профессионал лигасида давом эттириш имконига эга бўлди.

Footmercato нашрининг маълум қилишича, “Ал-Ҳилол” раҳбарияти 30 ёшли ҳужумкор футболчига таклиф юборди.

Манбага кўра, саудияликлар бир неча ойдан бери португалиялик футболчининг ўйинларини жиддий тарзда кузатиб келмоқда.

“Шаҳарликлар” ёзги трансферлар даврида бу юлдузни ҳам қўйиб юборишга тайёр. Чунки бош мураббий Хосеп Гвардиола таркибни ёшартириш сиёсатига жиддий эътибор қаратмоқда.

2017 йилдан бери “Манчестер Сити”да тўп тепиб келаётган Силва якунланган мавсумда барча турнирларда 49 та учрашув ўтказиб, ўз ҳисобига бешта гол ва тўртта ассист ёздириб қўйди. Унинг амалдаги шартномаси тугашига яна бир йил бор.