"Манчестер Юнайтед" 3 баробар арзон футболчи учун 100 миллион тўлади. Раҳбарият бутунлай ақлдан озганми?

"Манчестер Юнайтед" трансфер ойнасининг сўнгги кунларида жуда баҳсли харидни амалга оширди. Бразилиялик вингер Антони "Аякс"дан "қизил иблислар" сафига ўтди. Инглиз клуби бу трансфер учун 100 миллион евро сарфлади ва бу жамоа тарихда иккинчи энг қимматга харидга айланди - Поль Погба (105 миллион евро).

Кўплаб мутахассисларнинг фикрича, манкунианлар футболчи учун ортиқча сумма тўлаган. Боиси, 22 ёшли Антони “Transfermarkt” томонидан деярли 3 баравар арзон - 35 миллион еврога баҳоланган. Футболчининг статистикаси ҳам жуда мақталадиган даражада, деб бўлмайди - 33 ўйинда 12 та гол ва 10 та голли узатма. "Манчестер Юнайтед"ни бундай пул тўлашга нима мажбур қилди, раҳбарият нега арзонроқ вариантларни кўриб чиқмади? Бунинг бир қанча сабаблари бор ва ҳозир биз сизлар билан шуни таҳлил қилиб чиқамиз.

1-сабаб. Бош мураббий ва футболчи ўртасидаги муносабат

Вақт "Манчестер Юнайтед"га қарши ишлади. "Аякс" вазиятни назорат қилди ва манкунианларга кескин рад жавобини беришга шошилмади. Амстердамликлар ўзи учун керакли миқдорни олиши керак эди. Антони узоқ вақтдан бери "Манчестер Юнайтед" учун устувор мақсад бўлиб келган ва буни нидерландияликлар ҳам яхши биларди. Шу боис, клуб футболчининг нархини туширишмади. “Аякс”ни ҳеч нарса чўчитмас эди: улар вингерни таркибда қолишига қарши эмас ва кейинги мавсум ҳам катта миқдордаги пулга сотишига ишончи комил эди.

Нега МЮ Антонини сотиб олиш фикридан воз кечмади? Аввало, у Эрик тен Хаг синовидан ўтган футболчи эди ва мураббий бразилияликни ўз жамоасида кўришни истагани сабаб бўлди. Бу жуфтлик "Аякс"да биргаликда жуда самарали мавсум ўтказди. Футболчи тен Хаг қўл остида яхши ўйинлар намойиш этди. Қолаверса, Антонининг Чемпионлар Лигасида кўрсатган ажойиб финтлари ижтимоий тармоқларда кўп муҳокама қилинди.

Тен Хаг ўзининг тактик схемасида ўйнаш учун жамоани имкон қадар тезроқ тузишни хоҳлаётганини бир неча бор айтди. Антони эса бу тизимга тезда мослашиши керак, чунки у мураббийнинг барча кўрсатмаларини яхши билади ва ушбу схема доирасидаги ўзининг аниқ ролини билади.

"Манчестер Юнайтед" “Аякс”нинг яна бир ҳимоячиси Лисандро Мартинес учун ҳам катта пул тўлагани бежиз эмас. Унинг учун тўланган 57 миллион евро ҳаддан ташқари қимматга ўхшаб кўринади (“Transfermarkt” Мартинесни 32 миллионга баҳолаган). Айниқса, аргентиналик футболчининг бўйини ҳисобга олсак: 175 см – Премьер лигадаги марказий ҳимоячи учун жуда паст кўрсаткич. Аммо Мартинес тезда "Манчестер Юнайтед" ўйинига мослашиб кетди ва клуб сардори Харри Магуайрни захирага “михлади”. Демак, Антонининг ҳам таркибга мослашиши учун ортиқча вақт керак бўлмайди. Бу эса инқироздан тезроқ чиқиб, ғалабалар сари дадил одимлашни мақсад қилган "Юнайтед" учун жуда муҳим.

2-сабаб. Футболчининг имкониятлари юқори

“Transfermarkt” нашридаги нарх жуда субъектив. Ҳа, Антони айни дамдаги даражаси билан 100 миллион еврога арзимайди, аммо “Юнайтед” томонидан бу келажак учун киритилган сармоя. Бразилиялик футболчи эндигина 22 ёшда ва ўсиш учун катта имкониятларга эга.

Ҳа, унинг ўтган мавсумдаги ўйини жуда ҳам ҳайратланарли эмас. Лекин биринчидан, Антони Чемпионлар лигасида жиддий рақибларга қарши ўйинларда ўзини йўқотиб қўймади (7 ўйинда 2 та гол ва 4 та голли узатма), иккинчидан, у жамоа учун жуда кўп фойдали ишларни амалга ошира олади, жумладан, тўпсиз ҳам яхши ўйнай олиш қобилиятига эга. Бу эса АПЛ клублари учун жуда керакли нарса.

Истеъдод, ёш ва тен Хаг қўл остида ўсиш - "Манчестер Юнайтед" янги келган футболчи учун тўлаган нархнинг асосий таркибий қисми шундан иборат.

3-сабаб. Жамоанинг ҳужум чизиғи яхшиланиши

Тен Хаг қўл остида "Манчестер Юнайтед" 4-2-3-1 схемасида ўйнайди. Айни дам манкунияликларда бу  тизимни йўлга қўйиш учун етарли футболчи йўқ.

Антонининг келиши бу муаммони ҳал қилади. У ўнг қанотдан яхши дриблинг амалга оширади ва бу мазкур позицияда қийинчиликка дуч келган Санчога ўзи учун севимли бўлган чап қанотига ўтиш имконини беради. Агар Роналду кетса, Рэшфорд ўзи ёқтирган позициясида, ҳужум марказида ўйнаш имкониятига эга бўлади. Бундан ташқари, тен Хаг жамоасида исталган пайт олд чизиқни кучайтира оладиган Марсьяль, шунингдек, ёш вингерлар Эланга ва Диалло бор.

Шундай қилиб, Антони кучайиши керак бўлган позицияга мутлақо идеал номзодга айланди. Қолаверса, бразилияликнинг ҳаракати рўйхатдаги ҳужумкор ўйинчилардан яхшироқ фойдаланиш имконини беради. Англаганингиздек, клубнинг асосий мақсади — талабларига жавоб берадиган ёш ҳужумчилар гуруҳини яратиш. Бу ўзини қанчалик оқлайди, яқин вақт ичида гувоҳи бўламиз. “Манчестер Юнайтед” бундай трансфер учун 100 миллион сарфлашга қодир. Боиси, инглиз клуби қандай даромад олиш йўллари яхши билади.

Жамшидбек Маҳмудов тайёрлади.