Манчестерликлар "Челси" юлдузи трансфери бўйича келишиб олди

«Манчестер Юнайтед» клуби «Челси» билан яримҳимоячи Андрея Сантосни сотиб олиш бўйича келишувга келди. 

The Athletic нашри хабар беришича, трансфернинг кафолатланган қисми 56 миллион евродан ошиб кетади. Шартномада яна 2 миллион евродан ортиқ миқдорда осон бажариладиган бонуслар ҳам кўзда тутилган.

Манбага кўра, «Челси» келгусида Сантосни бошқа клубга сотишдан тушадиган сумманинг 10 фоизини олиш ҳуқуқини сақлаб қолади. 

22 ёшли футболчи «Манчестер Юнайтед» билан шахсий шартлари бўйича келишиб олган ва трансферни якунлаш учун сафарга чиқишга «Челси»дан рухсат олган.

Хабарларда таъкидланишича, «Челси» Сантосни юқори баҳолайди, бироқ футболчининг ўзи асосий таркибда мунтазам ўйнашни истамоқда. Бу эса амалда қийинроқ кўринади, чунки яримҳимоячи Мойсес Кайседо жорий йил апрель ойида клуб билан 2033 йилгача мўлжалланган янги шартнома имзолагани сабаб рақобат кескин кучайган.