Маненинг жароҳати ҳақида маълумот берилди

"Бавария" ҳужумчиси Садио Мане жароҳат олди. Охирги соатларда ОАВда футболчининг Сенегал терма жамоаси сафида жаҳон чемпионатида ўйнай оладими ёки йўқми, деган қарама-қарши маълумотлар пайдо бўлди. Шу боис, "Бавария" Маненинг аҳволи ҳақида маълумот берди.

"Вердер"га қарши ўйинда Мане ўнг оёғидан жароҳат олди. Мюнхен клубининг хабар беришича, ҳужумчи шанба куни бўлиб ўтадиган "Шальке-04"га қарши ўйинда иштирок этмайди. Мане кейинги кунларда яна кўрикдан ўтиши кутилмоқда. "Бавария" Сенегал футбол федерацияси тиббий ходимлари билан алоқада эканликларини қўшимча қилди.

Эслатиб ўтамиз, 20 ноябрь, якшанба куни Қатарда ЖЧ-2022 мусобақаси бошланади.