Мареска: "Иккинчи таймда ғалаба қозонишга яқин эдик"

"Челси" бош мураббийи Энцо Мареска "Ньюкасл"га қарши ўйин (2:2) якунлари бўйича фикр билдирди. Италиялик мутахассиснинг таъкидлашича, лондонликлар учрашувда ғалаба қозонишлари мумкин эди.

— Албатта, биринчи таймдан кейин рақиб ғалабага лойиқ эди. Аммо иккинчи таймда айнан биз ютишга муносиб бўлдик. Иккинчи голдан кейин ғалабани илиб кетиш учун уч ёки тўртта яхши имкониятимиз бор эди.

Мен учун биринчи таймдаги ҳал қилувчи воқеа ўтказиб юборилган гол бўлди. Учрашув бошланганидан уч дақиқа ўтиб гол ўтказиб юборсангиз, ўйин рақибга қулай томонга оғади. Шу билан бирга, иккинчи таймда икки марта гол урдик ва яна кўпроқ ҳам уришимиз мумкин эди. Танаффусда айрим ўзгартишлар қилдик. Бу стадионда ҳисобни қувиб етиш жуда қийин.

Сўнгги бир ҳафта ичида "Эвертон"ни мағлуб этдик, Лига кубоги ярим финалига чиқдик ва "Ньюкасл" билан дуранг ўйнадик. Бу эса ҳар доим яхши натижа ҳисобланади. Футболчиларнинг реакциясидан қониқдим, — деди "аристократлар" бош мураббийи.