Маркиньос «Црвена Звезда»га ўтиши бўйича қарорини эълон қилди

Маркиньос трансфер ҳақидаги миш-мишларга нуқта қўйди

«Спартак» жамоаси ярим ҳимоячиси Маркиньос «Црвена Звезда» клубига ўтиши мумкинлиги ҳақида тарқалган хабарларга ўз муносабатини билдирди.

Бразилиялик футболчига кўра, у Деян Станкович билан ҳеч қандай мулоқот қилмаган ва Сербия чемпионатига йўл олиш нияти йўқ.

«Станкович мени «Црвена Звезда»га чақирганми? У билан боғланмаганман, анча вақтдан бери гаплашмаганмиз. Унга фақат яхшилик ва омад тилайман. Лекин мен ҳозир «Спартак»даман ва «Црвена Звезда»га ўтишни режалаштирмаяпман», — деб таъкидлади Маркиньос.

Маркиньос 2024 йили «Спартак» сафини тўлдирган. Ўша пайтда жамоани Деян Станкович бошқарган эди. 2025 йил кузида сербиялик мутахассис Москва клубини тарк этди ва ҳозирда «Црвена Звезда»да фаолият юритмоқда.