“Машъал” мураббийлар штабида ўзгариш бўладими? - Ботир Қораев жавоб берди

Coca Cola Суперлигасининг 19-туридан ўрин олган "Машъал" – АГМК баҳсидан сўнг ташкил этилган матбуот анжуманининг иккинчи қисмида мезбонлар мураббийи Ботир Қораев қатнашди.

- АГМК жуда тажрибали жамоа, иккинчи ўринда бормоқда. Билгандик бугунги ўйин қийин ўтишини. Биринчи гол учрашувга қаттиқ таъсир қилди, деб ўйлайман. Убайдуллаевнинг хатосидан кейин гол ўтказдик. Бизда ҳам вазиятлар бўлди, биринчи таймда иккита имкониятдан дарвозани ишғол қилолмадик. Иккинчи голда дарвозабонимизга қарши қўполлик кузатилгандек. Вазиятни кўриб чиқамиз. Ҳозир четдан туриб гапириш нотўғри, деб ўйлайман.

"Машъал"нинг кетма-кет бешинчи мағлубияти? Албатта, қийин. Жамоамиз энди Суперлигага чиқди. Таркибимизда ёш ва Суперлигада ўйнамаган футболчилар бор. Ҳар бир баҳсда ғалабага ҳаракат қиляпмиз. Жамоа ёмон ўйин кўрсатмаяпти. "Қизилқум" билан беллашувда ҳам 4-5 та имкониятлар бўлди, уйда "Сурхон"га қарши баҳсда камида 7 та вазият яратилди. Бироқ футболчиларга дебютантлик таъсир қилмоқда.

Ўйин курашларга бой бўлди, лекин ақлни ишлатмадик

Мураббийлар штабида ўзгариш бўладими? Буни клуб раҳбарияти ҳал қилади. Ўз устимизда ишлаяпмиз, етарликча имкониятлар юзага келмоқда. Агар жамоада ўйин йўқ бўлса, тушунса бўларди. Ҳозир хулоса чиқариш жуда қийин.

Натижага ҳакамларнинг таъсири? Ўйин вақтида эҳтирос билан уларга эътироз билдиришимиз табиий ҳол. Аммо ҳакамларни муҳокама қилишга бизнинг ҳаққимиз йўқ. Рефериларнинг ишларини кўриб чиқадиган қўмита бор.

Дилявер Ваниев бетоблиги боис матбуот анжуманида қатнаша олмади. Насиб қилса, кейинги ўйиндан кейин Ваниевнинг ўзи матбуот анжуманида иштирок этади, - деди Ботир Қораев.