Мбаппе “Реал” таклифини икки марта рад этган!

Бугун жаҳоннинг энг кучли футболчиларидан бирига айланган Килиан Мбаппе фаолиятини қаерда давом эттириши кўпчиликни қизиқтирмоқда.

Форварднинг ўзи “Реал”да тўп тепмоқчи. Мадридликлар ҳам уни эркин агент сифатида 2024 йилнинг ёзида клубга келишини кутяпти.

Mundo Deportivo нашрининг ёзишича, Мбаппе бунгача икки марта “Реал”га ўтмаган экан. Ҳаммаси 2015 йили бошлаган. 16 ёшида “Монако”да порлай бошлаган Килиан мадридлик скаутлар назарига тушган.

2017 йили “Реал” вакиллари “Монако”га 160+20 миллион евро таклиф қилган. Бироқ, ишга 180 миллион евро таклиф қилган ПСЖ аралашган. Парижликлар мадридликлардан фарқли равишда Мбаппега асосий таркибдан жой кафолатлаган.

Кейин ПСЖ Мбаппени бир мавсум ижарада ўйнатиб, 2018 йили тўлиқ трансфер қилди.

Ўтган йили ёзда “Реал” Мбаппени эркин агент сифатида қўлга киритишга яқин турганди. Бироқ, ПСЖ истеъдодли ҳужумчини Парижда қолишга кўндирди.