Мбаппе “Реал” туфайли “Олтин тўп”ни ололмаслигидан хавотирда

Мадриднинг «Реал» клуби француз ҳужумчиси Килиан Мбаппе жамоа раҳбариятининг суст позицияси туфайли «Олтин тўп»ни қўлга кирита олмаслигига ишонмоқда. Бу ҳақда испаниялик журналист Иван Мартин ижтимоий тармоқларда хабар берди.

Манба маълумотларига кўра, ҳужумчи мадридликлар унинг номзодини оммавий ахборот воситаларида тарғиб қилиш борасидаги ишларидан норози. Француз футболчиси ўтган мавсумдаги юқори натижадорлиги ва статистик кўрсаткичлари клуб раҳбарияти томонидан анча кучли ва фаол пиар-қўллаб-қувватлашга лойиқ эди, деб ҳисобламоқда.

Шунингдек, Мбаппе ўзининг машҳур ватандоши, «Реал»нинг собиқ бош мураббийи Зинедин Зидан томонидан очиқ қўллаб-қувватланишини кутгани, аммо унинг номзоди фойдасига билдирилган очиқ баёнотларни ололмагани таъкидланмоқда.

2026 йилги «Олтин тўп»ни топшириш маросими 26 октябрь, душанба кунига белгиланган. Тадбир Лондонда бўлиб ўтади ва ушбу маросим тарихдаги 70-маротаба ташкил этилади. Эслатиб ўтамиз, ғолиб ФИФА рейтингининг энг кучли 100 талигига кирган мамлакатлардан 100 нафар журналист иштирокидаги овоз бериш орқали аниқланади.