Мбаппенинг ўрнини ким эгаллайди? Бош мураббий жавоб берди

ПСЖ бош мураббий Луис Энрике жамоани тарк этаётган Килиан Мбаппенинг ўрнини ким эгаллаши ҳақидаги саволга жавоб берди.

- Мбаппенинг ўрнини ким эгаллайди? Биз бу масалани бутун жамоа бўлиб, Парижга келиб, тарих яратишни истайдиган ўйинчилар билан бирга муҳокама қилиш орқали ҳал этмоқчимиз. ПСЖ ўзига хос клуб, - деди Луис Энрике.

Париж клуби раҳбарияти 25 ёшли ҳужумчини жамоада олиб қолиш учун охиригача курашди. Бироқ Мбаппе ўз фикрида қатъий туриб, жамоани тарк этишини билдирди.

Килиан Мбаппе Париж клубида олти йил тўп тепди. Ички чемпионатда бир неча совринларни қўлга киритганига қарамай, жамоаси билан халқаро миқёсда катта муваффақиятларга эриша олгани йўқ.

Мбаппе Париждаги фаолияти давомида 256 та гол уриб, клуб тарихида энг кўп тўп киритган футболчи бўлди.