Мерино тўрт ойга сафдан чиқди, Финалиссимани ўтказиб юборади

"Арсенал" ярим ҳимоячиси Микель Мерино оёқ панжаси сингани сабаб камида тўрт ой майдонга туша олмайди. Бу ҳақда журналист Гастон Эдул хабар берди.

Манбага кўра, Испания терма жамоаси футболчиси аниқ равишда Финалиссимани ўтказиб юборади. Аргентина ва Испания терма жамоалари ўртасидаги баҳс 27 март куни Қатардаги "Лусаил" стадионида бўлиб ўтади.

Яқинда "Арсенал" ярим ҳимоячиси жарроҳлик амалиётини бошдан кечирди. "Канонирлар" бош мураббийи Микель Артета бугун испаниялик футболчининг тикланиш муддати ҳақида фикр билдирди.

"Ўйлайманки, шифокорлар операция қандай ўтганидан мамнун. Олдинда, албатта, узоқ тикланиш жараёни турибди — гап суякнинг битиши ҳақида кетмоқда.

Биз барча зарур муддатларга амал қиламиз ва ишонаманки, у тикланишни тезлаштириш учун қўлидан келган барча ишни қилади.

Муддатлар ҳақида гап кетганда, бу ойлар билан ўлчанади: уч, тўрт ёки беш — ҳозирча аниқ эмас", — деди Артета.