Месси “Барса”га енгилди. Отаси ўғлининг “озодлиги” учун охиригача курашади!
Месси “Барселона” раҳбариятига қарши бош кўтарганига қарамай, охир-оқибат ўзи истаганидек клубни тарк эта олмади.
Бартомеунинг қатъияти Леонинг йўлини тўсди. Бир неча кун давом этган можарода Бартомеунинг Хорхе Месси билан учрашуви кўп нарсани ҳал қилди. Унга кўра, клуб раҳбари аргентиналик ҳужумчи 700 миллион евро бадал пулисиз кетолмаслигини уқтирди. Трансфер бўйича бошқа таклифлар кўриб чиқилмаслигини айтди.
Месси ишни судгача боришини истамади ва яна бир мавсум Каталонияда қолишга рози бўлди. Ҳозир футболчи вазият бўйича мурожаатнома тайёрлаётгани айтилмоқда.
Шундай бўлса-да, Хорхе Месси ўғлининг “озодлиги” учун охиригача курашмоқчи. У Испания примераси раҳбари Хавьер Тебасга мактуб йўллади.
Хорхе Месси ўз мурожаатида ўғлининг шартномасида агар келишув бир томонлама бекор қилинса, 700 миллион евролик бадал пулини талаб қилиш ноқонуний эканини уқтирмоқда. Шунингдек, у лига раҳбарини ушбу можарода клубга ёнбосишда ҳам айбламоқда.
Испания Ла Лигаси раҳбарияти Хорхе Мессининг иддаоларини қабул қилмади ва 700 миллион евролик бадал пули тўланиши шартлигини билдирди.
Фикрлар