Месси: Жаҳон чемпиони бўлмаганимда мени бошқа кўрмасдингиз!

Лионель Месси агар Аргентина 2022 йили Қатарда ўтказилган жаҳон чемпионатида ғолиб чиқмаганида халқаро фаолиятини якунлаган бўлишини айтди.

- Менга Қатардаги жаҳон чемпионати жуда ёқди. Чунки у мен учун охиргиси бўлишини билардим. Ростини айтсам, агар биз чемпион бўла олмаганимизда мени миллий терма жамоада кўрмасдингиз.

Мен клуб миқёсида ва шахсий совринларнинг барчасини қўлга киритдим. Лекин терма жамоам билан жаҳон чемпиони бўлмаганимда бир нима етишмаётгандек ҳис бўлаверарди.

Бугун мен жаҳон чемпиони сифатида терма жамоани ташлаб кета олмайман ва ҳар бир лаҳзадан қувонч олишни истайман. Бу  менга хотиржамлик бағишламоқда, - деди Лионель Месси.