Месси Ла Лигада ҳали бери янгиланмайдиган рекорд ўрнатди

Хабарингиз бор, “Барселона” форварди Лионель Месси бугун Ла Лиганинг 18-туридан ўрин олган “Гранада”га (4:0) қарши ўйинда дубль қайд этди ва ўзининг чемпионатдаги голлари сонини 11 тага етказиб, тўпупарлар пойгасида 1-ўринга кўтарилиб олди.

Яна бир аҳамиятли жиҳати шундаки, 33 ёшли аргентиналик футболчи Испания Ла Лигасида кетма-кет 15 та мавсумдан буён 10 тадан кўп гол ураётган тарихдаги биринчи футболчига айланди.

Маълумот учун, Месси Испания чемпионатидаги биринчи голини 2005 йилнинг 1 май куни “Альбасете”га қарши ўйинда киритган. У ўшанда 17 ёшу 10 ой ва 7 кунлик эди. Месси “Барселона” тарихида Ла Лигада гол урган энг ёш футболчи ҳамдир.