Мессидан зўри бор: Америка кубогининг энг зўр ўйинчиси ким бўлди?

АҚШ мезбонлик қилган Америка кубоги Аргентина ва Колумбия терма жамоалари ўртасидаги финал билан ўз якунига етди.

Бу гал ҳам бош соврин Лионель Месси бошчилигидаги Аргентина терма жамоаси вакилларига насиб қилди.

Бироқ, турнирнинг энг зўр ўйинчиси номи бошқа футболчига берилди. Колумбия терма жамоаси етакчиси Хамес Родригес ҳали ҳамон маҳорат бобида ҳеч кимдан қолишмаслигини исботлади.

33 ёшли ҳужумкор футболчи мусобақа давомида олти маротаба майдонга тушди. Бу баҳслар давомида ўзи битта гол уриб, жамоадошларига олтита голли пас узатди.

Юқори самарадорликни қайд этган Родригес Америка кубогининг энг яхши футболчисига аталган соврин билан тақдирлашди.

Хамес Родригес Колумбия терма жамоасида жами 107 та учрашувда иштирок этиб, ўз ҳисобига 28 та гол ва 33 та голли пас ёздириб қўйган.