"Металлург" - бу нафақат яхши клуб, балки катта аҳил оиладир" - Веско Стешевич собиқ жамоасининг ҳамон ғалабасизлигини қандай изоҳлайди?

“Металлург” клубининг черногориялик собиқ бош мураббийи Веско Стешевични ҳали унутмаган бўлсангиз керак. У Бекобод клубини бошқаришда давом этаётганди ва шу йили биринчи давра якунига етмасдан олдин истеъфога чиқарилди. Бунга жамоанинг ғалабасиз серияси сабаб эди. Қизиғи, ҳозир ҳам “Металлург” ушбу ёқимсиз серияни давом эттиряпти. Sports.uz журналисти Веско Стешевич билан боғланди.

- Жаноб Стешевич, “Металлург”дан кетганингиздан кейин нима билан машғулсиз? Билишимча, сиз ҳали ҳеч қайси клубда эмассиз!

- “Металлург”дан кетганимдан кейин футбол билан шуғулланганим йўқ. Бунга сабаб, афсуски, оиламдаги энг яқин инсонимнинг соғлиги билан боғлиқ бўлди.

- Сиздан кейин ҳам “Металлург” ҳали ғалаба қозонгани йўқ. Мураббийларни ўзгартириш ҳам ҳозирча ёрдам бермаяпти. Бу хусусида нима деган бўлардингиз?

- Биласизми, кўп омиллар борки, жамоани эришаётган натижаларига боғлиқ бўлади. Биз яхши ўйинчилардан жамоа туздик. Улар деярли бир хил савиядаги футболчилар эди. Фақат етакчи ўйинчиларимиз етишмаётганди. Неъматжонов ҳамда Ўринбоевни қайтишини кутаётгандик. Улар фақат майдонда эмас, ечиниш хонасида ҳам етакчи эдилар. Афсуски, ушбу ўйинчилар ҳозир ҳам тўлиқ тайёр эмаслар. Бундан ташқари, “Металлург” ўз уйида ўйнамаётганига ҳам кўп нарса боғлиқ, биринчи даврада биз кўплаб яхши ўтказган учрашувларимизда ютолмадик. Ҳар бир ўйинда қўллаб-қувватлаб турадиган мухлисларнинг ўрни билинди. Айнан ўйинимиз чиқмаётган пайтда ишқибозларнинг фаол олқишлаши бизга албатта ёрдам берган бўларди. Ўйинчиларимиз эса мухлисларнинг қўллашига ўрганиб қолишган. Ўйинимиз чиқмаётган пайтда ишқибозларнинг олқишлаши зарур эди. Мен кетганимдан кейин ҳам бу муаммолар бартараф этилгани йўқ ва жамоа чемпионатда ҳамон ғалаба қозона олмаяпти. Яхшиҳамки, танаффус бор эди. Клуб раҳбарияти бир нечта тажрибали футболчиларни сотиб олди ва жамоа ДНКсини ўзгартиришди. Лекин бирданига натижага эришиш қийин. Жамоадаги ҳолатни тўғрилаш учун мураббийлар штабига вақт керак. Ҳозирги кичик танаффус умид қиламанки жамоага ёрдам берди ва кейинги ўйинларга тайёргарликни кучайтиришди. Ишонаманки ва чин қалбимдан тилайманки, “Металлург” кейинги турда ғалаба қозонади ва узоқ кутилган бу ғалаба футболчиларга ишонч беради.

- “Металлург”даги фаолиятингиз давомида сизга нима ёқди ва нима ёқмади?

- “Металлург” – бу нафақат яхши футбол клуби, балки катта аҳил оиладир. Шу ўринда клуб раҳбариятига миннатдорчилик билдираман. Мен шундай жамоада ишлаганимдан хурсандман. Бирга ишлаган ёрдамчиларим ва футболчиларга ҳам раҳмат айтаман. Бундан ташқари, шифокорлар, массажчилар, администраторлар, базада қулай шароит яратиб бераётган барча ишчи-ходимлардан ҳам миннатдорман. Айниқса, қийин вазиятда жамоани қўллаб-қувватлашдан тўхтамаган ва тўхтамайдиган мухлисларга катта раҳмат. Улар ҳақиқий фанат! Жамоага омад тилайман. Чемпионатни яхши тугатишларини ва янги мавсумда ҳам муваффақиятли қатнашишлари хоҳлаб қоламан.

- Қандай таклифлар бор ва мураббийликка қачон қайтмоқчисиз?

- Бир нечта хориж клубидан менга таклифлар бўлди. Аммо юқорида айтиб ўтганимдек, оилавий сабабларга кўра ушбу таклифлар ҳақида ўйламадим. Албатта, вазият яхши кечса мен ишлашга тайёрман. Чунки ишимни соғиндим.

- Ўзбекистон чемпионатида сизни нима ҳайратга солди?

- Ўзбекистон футболининг савияси анча ўсди. Жуда кўплаб иқтидорли ўйинчилар бор. Суперлигада ташкилотчилик жуда яхши. Инфраструктураси ҳам мақтовга арзигулик. Кўриниб турибдики, Ўзбекистон Президенти футболни яхши кўради.

- Агар “Металлург”га қайтиш имконияти бўлганида қайси ишингизни такрорламаган бўлардингиз?

- “Металлург”даги фаолиятимни таҳлил қилдим ва ўзим учун бир нечта хулосаларни чиқардим. Албатта, баъзи-бир ишларни бошқача қилсам ҳам бўларди. Аммо бу менинг шахсий қарашларим ва фикрим нотўғри бўлиши ҳам мумкин. Бу хусусида оммага айта олмайман.  

Шуҳратбек Жўраев.